Skip to content
Амбасадорот на ЕУ во земјава Михалис Рокас, на денешната седница на Националниот совет за евроинтеграции и Комисијата за европски прашања, со порака до власта, за латентниот однос кон македонската евроинтеграција. Рокас, од Собранието изјави дека треба да се искористи, ‘моментумот на наклонетост во Европската комисија кон земјата за почеток на преговори за членство во Унијата, пред се и над се заради придобивките за граѓаните кои сакаат да бидат дел од Европското семејство“
„Од наша страна сме посветени и подготвени да ви помогнеме да го изодите патот кон Европската Унија. Како што сите сведочевте во последните неколку извештаи од Брисел, има голем интерес и благонаклонетост кон Република Северна Македонија да се отвори првото поглавје во преговорите. Во минатиот состав Собранието не успеа да го постигне двотретинското мнозинство потребно да се направат измени во Уставот и да се вклучат граѓаните коишто живеат во границите на оваа држава, меѓу другите и Бугарите. Новиот собраниски состав треба да ја забрза својата работа и да продолжи со реформите коишто се неопходни за процесот на евроинтеграција на државата вклучително и уставните измени“ рече Рокас.
Од друга страна шефот на дипломатијата Тимчо Муцунски, пред два дена на работниот појадок, на амбасадорите на земјите-членки на Европската Унија во земјата, без да ги спомне уставните измени, рече дека доследно се исполнуваат договорите со Грција и Бугарија, и дека Владата е подготвена за дијалог во добра волја и изнаоѓање на рационални решенија. Муцунски побара „ЕУ да донесе стратешка одлука како ќе постапува со Македонија, 2025та е година со неславен јубилеј – 20 години кандидатски статус“.
На денешната прва седница на НСЕИ, претседавачот Венко Филипче, рече дека забрзувањето на реформите во клучните области е неопходно за напредокот на државата и дека „сите треба да дадат придонес за отворање на првиот кластер“. Филипче најави дека во следниот период ќе има почести седници на ова собраниско тело.
„Добро е да се одржува консензусот за членство во Европската Унија. Секој од нас има одговорност да придонесе кон овие напори. Овие предизвици бараат зајакнување на институциите и системите, за да станеме што покомпатибилни со законодавството и практиките на Европската Унија, рече Филипче.
