Државите од Балтичкото Море повикуваат на заедничка акција против руската „флота во сенка“

Советот на државите од Балтичкото Море повика на воведување нови правила за поморски снабдувања што би овозможиле построга заедничка акција против таканаречената руска „флота во сенка“, објави ДПА.

-Почитувањето на меѓународните прописи и правото на морето е неопходно, изјавија министрите за надворешни работи на 11-те земји-членки на Советот по денешниот состанок во Естонија.

„Ни требаат подобри регулативи што создаваат предвидлива и безбедна средина за меѓународна трговија“, рече полскиот министер за надворешни работи Радослав Шикорски.

Тој се осврна на инцидентот од вторникот кога руски борбен авион накратко влезе во естонскиот воздушен простор. Естонската морнарица претходно се обиде да провери танкер без знаме.

Според естонскиот министер за надворешни работи Маргус Цахкна, ова е прв пат Русија официјално да покаже дека има врска со „флотата во сенка“, која вклучува бродови со нејасна сопственост што се користат за заобиколување на западните санкции. Европската Унија веќе воведе санкции врз стотици бродови, но се верува дека вистинскиот број на танкери во оваа флота е многу поголем.

Високиот дипломат на Латвија изјави дека околу 84 проценти од извозот на цврсто гориво од Русија, што е повеќе од една третина од приходите на Москва, минува низ Балтичкото Море преку „флотата во сенка“.

Во последните месеци, земјите од Балтичкото Море го засилија надзорот врз подводната инфраструктура откако имаше неколку случаи на наводна саботажа на кабли и жици извршени од „флотата во сенка“.

Советот на државите од Балтичкото Море, основан во 1992 година, ги вклучува Германија, Данска, Естонија, Финска, Литванија, Латвија, Полска и Шведска, како и Исланд, Норвешка и ЕУ.

Членството на Русија беше суспендирано на почетокот на март 2022 година поради нејзината инвазија на Украина, а Москва се повлече од организацијата во мај истата година.