ЕУ и Кина во преговори

Европската унија и Кина се согласија да разгледаат воведување минимални цени за електрични возила произведени во Кина, како алтернатива на царинските давачки што ЕУ ги воведе минатата година, изјави во четврток портпаролот на Европската комисија.

Германскиот весник „Ханделсблат“ претходно во четврток објави дека преговорите се започнати.

Комесарот на ЕУ за трговија, Марош Шефчовиќ, во последните 24 часа разговараше со кинескиот министер за трговија, Ванг Вентао, и двете страни се согласија да ја разгледаат можноста за воведување минимални цени, изјави портпарол на ЕУ, според Ројтерс.

Кинеското Министерство за трговија објави дека преговорите треба да започнат „веднаш“.

Минатиот октомври, ЕУ ги зголеми царините за електрични возила произведени во Кина на 45,3%, но Брисел и Пекинг ја изнесоа идејата за укинување на тие царини преку можна обврска за минимална цена – позната како „обврска за цена“ за увезени возила.

Европската комисија изјави дека е подготвена да ги продолжи преговорите за алтернатива на царинските давачки со Кина. Воведените царини вклучуваат 17,0% за возила произведени од BYD, 18,8% за Geely и 35,3% за SAIC – покрај постојната стандардна царина за увоз на автомобили во ЕУ од 10%.

Разговорите за можен компромис околу долготрајниот трговски спор – кој ги потресе и француските производители на коњак бидејќи Пекинг презеде контрамерки – доаѓаат во време кога американскиот претседател Доналд Трамп води трговска војна со некои од најблиските трговски партнери на САД, вклучувајќи ги ЕУ и Кина.

Пекинг минатата година воведе казнени царини за францускиот коњак, што го отежнува продавањето во втората по големина економија во светот, која е исто така голем пазар за бренди од глобални компании како што се „Хенеси“, „Реми Коантро“ и „Перно“.