Европскиот парламент повика на мирна транзиција на власта во Сирија

Пратениците на Европскиот парламент (ЕП) денеска повикаа на мирна транзиција на власта во Сирија, што, како што наведоа, ги исполнува демократските аспирации на сирискиот народ и обезбедува заштита на сите Сиријци, по соборувањето на сирискиот претседател Башар Ал Асад.

Претседателот на Комисијата за надворешни работи на ЕП, Дејвид Мекалистер, претседателот на делегацијата на ЕП за односи со земјите од Машрек, Лорен Кастиљо и постојаниот известувач за Сирија, Натали Лоасо, во заедничка изјава го поздравија, како што наведоа, „ крајот на бруталната диктатура во Сирија, една од најнасилните што ги видел светот“.

Тие оценија дека „режимот на Асад беше соборен со ограничено крвопролевање бидејќи ја немаше поддршката од својот народ и затоа што беше напуштен од неговите сојузници Русија и Иран“.