Skip to content
Европските лидери денеска ќе се состанат во Париз на итен самит за војната во Украина што го свика претседателот на Франција Емануел Макрон.
До повикот за итна средба дојде како реакција на загриженоста дека САД влегуваат во мировни преговори со Русија без учество на земјите од Европа.
Британскиот премиер Кир Стармер, кој се очекува да присуствува на самитот во Париз, рече дека тоа е „момент кој се случува еднаш во генерација за нашата национална безбедност“ и дека е јасно дека Европа мора да преземе поголема улога во НАТО.
Европските лидери се организираат откако специјалниот пратеник на Доналд Трамп за Украина рече дека европските лидери ќе бидат консултирани, но нема да учествуваат во какви било разговори меѓу САД и Русија за завршување на војната.
Високи претставници на Белата куќа, вклучително и американскиот државен секретар Марко Рубио, треба да се сретнат со руските преговарачи во Саудиска Арабија во наредните денови. Американски официјални лица рекоа дека Украина била исто така поканета – иако претседателот Володимир Зеленски вели дека неговата земја не добила таква покана.
Меѓу изјавите кои предизвикаа загриженост во Украина и меѓу европските сојузници, е и онаа на специјалниот пратеник на Трамп Кит Келог рече дека претходните преговори пропаднале бидејќи биле вклучени премногу страни.
Францускиот претседател ги повика европските лидери на итен самит во Париз за да се разговара за проблемите поврзани со изјавите на Доналд Трамп.
До вчера до доцните часови не беше јасно дали на состанокот ќе присуствуваат сите лидери на ЕУ или само мала група земји и дали ќе бидат поканети и други европски лидери.
