Фетаи и Сулејмани се сретнаа со вработените во Државниот ансамбл на албански песни и ора

Вицепремиерот задолжен за добро владеење Арбен Фетаи и заменик-министерот за култура и туризам Седат Сулејмани денеска во Владата ги пречекаа вработените и уметниците од Државниот ансамбл на албански песни и ора за да го прослават решавањето на нивниот работен статус.

„Ова е важен момент кој не само што ги подобрува големите неправди, туку и претставува важен чекор во развојот и зајакнувањето на оваа важна институција на албанската култура“, истакнал Фетаи на средбата. 

Како што информира владината прес-служба, вицепремиерот Фетаи изразил поддршка за уметниците и развојот на културата, додавајќи дека културата е национално богатство и дека ангажманот на Владата е непоколеблив во зајакнувањето на ансамблот, со цел зачувување на богатото културно наследство и создавање простор за нова енергија и иновативни идеи.

Фетаи им се заблагодарил на сите уметници и вработени кои со својот талент и посветеност ја одржуваат жива традицијата. 

„Да работиме заедно за иднина во која албанската култура ќе има централна улога во националниот идентитет и ќе инспирира генерациите кои доаѓаат“, се вели во соопштението.