Skip to content
„Искуството од минатото ни покажа дека е ризично да се има гломазна, безбедносна партизирана институција која може да се злоупотреби и затоа како претседателката, треба итно да интервенирате“. Ова и го посочил лидерот на опозициската СДСМ, Венко Филипче, на претседателката Гордана Сиљановска Давкова, за време на средбата во Вила Водно.
Филипче истовремено и ја пренел и загриженоста за ризикот од партизацијата во безбедносните структури, од страна на власта, особено од најавите на Мицкоски за спојување на двете безбедносни агенции – Агенцијата за национална безбедност и Агенцијата за разузнавање. Од шефицата на државата побарал поголем ангажман, бидејќи дел до безбедносните служби се во нејзина надлежност.
„Сметам дека ризикот може да биде многу голем доколку настане фузија на двете безбедносни агенции, а се продолжи со партизацијата“, и сугерирал Дилипче на Сиљановска – Давкова.
Од друга страна пак, премиерот Христијан Мицкоски, изјави дека спојувањето на АНБ и АР е потребна реформа, за која разговарал и со претседателката.
„Не, затоа што некој има лична фрустрација, па ќе спојува институции, туку затоа што тоа го направиле во најголемиот дел од нашите сојузници во НАТО. Кога Владата ги подготвува законите, и реформите ги подготвува во рамки на институциите. Кога ќе имаме работна верзија, ќе ја презентираме пред јавноста“, рече Мицкоски.
Неодамна за прв човек на АНБ, е поставен, Бојан Христовски.
Според СДСМ со назначувањето на Христовски за директор на АНБ, власта прави опасна партизација на Агенцијата за национална безбедност.
„Со поставувањето на лице кое до 2023-та година беше претседател на градскиот комитет на ВМРО ДПМНЕ, директно е прекршен членот 10 од законот за АНБ,“ потенцираат од СДСМ.
Денешната средба во Вила Водно, меѓу претседателката на државата, Сиљановска Давкова и лидерот на СДСМ, Венко Филипче се случи по барање на шефот на опозициската партија.
