Skip to content
Во богатата палета на европски дестинации кои пленат со убавина, три места се издвојуваат не само по својата популарност, туку и по сериозните проблеми што ги носи прекумерниот туризам.
Според истражувањето на потрошувачката платформа, спроведено врз основа на податоците од Европската комисија, најфреквентни точки се: сончевата Мајорка, разиграниот Закинтос и вечно шармантниот Париз.
Мајорка – пренатрупаниот рај на Балеарските Острови
Оваа идилична шпанска оаза со население од 966.000 жители доживува вистинска туристичка инвазија – во 2023 година на Мајорка се забележани неверојатни 51 милион ноќевања, со кои оваа островска убавица ги надмина дури и метрополите како Лондон, Париз и Рим.
И додека песочните плажи и тиркизното море се идеал за туристички разгледници, секојдневието на локалното население е сè само не идилично. Улиците се опколени од забави и туристи без никакво внимание за локалната култура. Како одговор, властите на Мајорка воведоа политика на нулта толеранција – построги казни сега го чекаат секој што ќе се вклучи во вандализам, улично пиење и насилничко однесување.
Закинтос – грчки бисер на работ на исцрпеност
Зеленилото, кристално чистото море и спектакуларниот залив Навагио го прават Закинтос една од најфотографираните дестинации на Медитеранот. Сепак, овој грчки скапоцен камен, дом на само 40.000 жители, прима дури 6 милиони туристи годишно, што е водечки по бројот на туристи во споредба со бројот на локални жители.
За оние кои бараат тишина, мир и автентично островско искуство, Закинтос повеќе не е тој скриен рај. Инфраструктурата е преоптоварена, локалната заедница на работ на исцрпеност, а природните ресурси се сè поподложни на уништување.
Париз – градот на светлината под туристичкото внимание
Кога се гледа бројот на туристи на квадратен километар, Париз ја носи апсолутната победа: во просек над 418 туристи на километар. Романтичните прошетки по Сена, уметничките галерии и луксузните авении секојдневно се опколени од реки луѓе од целиот свет. Градот на светлината, иако секогаш заводлив, дише сè потешко и потешко под притисокот на сопствената слава.
Овој феномен на туристичка инвазија го менува ликот на Европа – од егзотични острови во урбани метрополи. Додека туризмот останува клучна економска гранка, се повеќе локални заедници и експерти за животна средина повикуваат на поодржлив пристап, кој би го комбинирал зачувувањето на културниот идентитет и природните убавини со одговорното гостопримство.
Во луксузниот свет на патувањата, време е ексклузивноста да не значи само престиж, туку и почитување на просторот, луѓето и природата кои го овозможуваат тој престиж.
