Грција ги интензивира враќањата на мигранти во трети земји – за два дена вратени 160 грузијски државјани

Во рок од 48 часа од Грција во Грузија биле вратени 160 лица, дел од нив мигранти кои не добиле азил, а поголемиот дел во рамките на програмата за доброволно враќање во земјите на потекло, јави дописничката на МИА од Атина.

Од Министерството за миграција и азил на Грција соопштија дека враќањата на мигранти во трети земји е „во рамките на националната стратегија за праведна, но истовремено и строга миграциска политика“.

Денеска, според Министерството за миграција и азил на Грција „беше завршено едно од најмасовните враќања досега“, односно 134 грузиски државјани биле доброволно вратени, во рамките на програмата за помогнато доброволно враќање и реинтеграција организирано од Меѓународната организација за миграција (ИОМ).

Во текот на вчерашниот ден 26 нелегални мигранти, грузијски државјани, чии барања за меѓународна заштита се дефинитивно одбиени, биле вратени во Грузија, а операцијата на враќање ја спровела грчката полиција, под координација на надлежната европска служба.

– Владата и политичкото раководство на Министерството за миграција и азил ја потврдуваат нивната заложба за целосна имплементација на законот, нагласувајќи ја потребата од зајакнување и на програмите за принудно враќање и за доброволно заминување, соопштија од Министерството.

При реконструкцијата на Владата што грчкиот премиер ја направи минатиот месец, имаше промени и во Министерството за миграција и азил, а пред десет дена Мицотакис одржа состанок со новиот министер Макис Воридис и една од главните теми беше токму враќањето на мигранти.

Воридис тогаш посочи дека „приоритетите за следниот период се поврзани со справувањето со нелегалната миграција, што има и важна европска димензија, бидејќи новата европска регулатива за враќањата е во фаза на преговори“, а Мицотакис нагласи дека доколку некој влезе нелегално во Грција и нема право на азил, ќе направат сè што е во нивна можност за да го вратат во земјата на потекло.

Грчкиот премиер овој став го истакна и по завршувањето на Самитот на ЕУ во Брисел пред две седмици кога рече дека сега веќе е заеднички став во Унијата „дека не може да постои кохерентна миграциска политика без ефективно чување на надворешните граници и без да има ограничување на протокот на оние кои нелегално влегуваат во Европската унија“.