Грција во училиштата ќе воведува едукативна програма за однесувањето на социјалните мрежи

„Воведување едукативна програма во рамките на предметот информатика за тоа како учениците да управуваат и да се однесуваат на социјалните мрежи“, рече министерот за образование на Грција, Кирјакос Пиеракакис, за грчката телевизија „Антена“.

Според Пиеракакис, безбеднотло користење на интернетот од страна на децата, е приоритет за грчките власти.

„Со други зборови, на пример, имаш под 15 години, а некој непознат ти праќа порака. Што одговараш, како реагираш, што им кажуваш на родителите, што кажуваш на училиште, како треба да реагираш, како управуваш со фотографиите, како управуваш со тоа што го пишуваш на социјалните мрежи. Сето ова ќе биде вклучено, истакна Пиеракакис и додаде дека првично, програмата ќе биде како игра и ќе биде вклучена во предметот информатика.

Тој говореше и за идејата за воведување на специјална апликација преку која родителите ќе го блокираат пристапот на децата на социјалните мрежи.

„Се размислува за мерка за која мора да има одлуки на европско ниво за да функционира како што треба, но во првата фаза се разгледува апликација која ќе биде инсталирана од родителите на мобилните телефони на децата и во суштина ќе го блокира пристапот, врз основа на возраста, на социјалните мрежи“, рече министерот за образование на Грција.

Во истражување на јавни мислење објавено од грчката телевизија Алфа, седум од десет Грци, односно 72 отсто се согласуваат со одлуката на Австралија да се забрани употребата на социјални мрежи за деца под 16 години.