Гроси: Нема оштетување на нуклеарните постројки во Иран

Генералниот директор на Меѓународната агенција за атомска енергија (МААЕ), Рафаел Гроси, денеска изјави дека нуклеарните постројки во Бушер, Исфахан и Фордов не се оштетени во нападите на Израел врз цели во Иран и дека не е забележано зголемување на нивото на радијација на локацијата Натанз.

Тој напиша на социјалната мрежа Икс дека иранските власти ја информирале МААЕ дека нуклеарната централа Бушер не била цел на нападот и дека не е забележано зголемување на нивото на радиоактивно зрачење на локацијата Натанз.

„Понатамошните контакти со иранските власти потврдуваат дека нуклеарниот полигон Исфахан исто така не е оштетен. Постројката за збогатување гориво Фордов досега не е оштетена. Агенцијата внимателно ја следи многу загрижувачката ситуација во Иран. Агенцијата може да потврди дека локацијата во Натанз била меѓу целите. Агенцијата е во контакт со иранските власти во врска со нивото на зрачење. Исто така, сме во контакт со нашите инспектори во земјата“, напиша Гроси.

Израел го нападна Иран рано изутрината, а според агенцијата Ирна, убиени се бројни воени команданти, научници и цивили.