Груби во илегала е популарен како Кардашијан, не се симнува од насловни страни

Најновата неофицијална вест е дека поранешниот вицепремиер, осомничен во случајот „Лотарија“, Артан Груби, престојува во Албанија, во близина на северот од Драч, во месноста Хамалај, позната по своите прекрасни песочни плажи, повлеченост, изолација и приватност.

Информациите во медиумите за локацијата на Груби се протечени од членовите на владата и одредени институции кои располагаат со неофицијални информации дека Груби престојува покрај Јадранско море.

Претходно, вицепремиерот Изет Меџити, во интервју за албанската „Ора њуз“ рече дека и, според неговите информации, Груби не е повеќе во Косово, туку во Албанија.

„Но, тоа не е важно, со бегството тој ја докажа вината и затоа побегна од државата. Мислам дека денес, утре или задутре тој еден ден ќе се соочи со правдата“, рече Меџити.

За поранешниот вицепремиер Груби, кој е осомничен за проневера од 8 милиони евра во Државна лотарија, премиерот Христијан Мицкоски рече дека не сака да шпекулира дали побегнал во Албанија или во Косово.

„Различни се информациите, не би шпекулирал дали е во Албанија или Косово. Факт е дека не бил чист како солза бидејќи ако бил, немало потреба да биде бегалец од правдата – ќе дојде тука и ќе ја брани својата невиност“, рече Мицкоски, кој смета дека тој не е политички бегалец, туку бегалец од правдата и затоа очекува да не добие азил во странство.

Груби, на 15 декември, заминува од Македонија преку граничниот премин „Блаце“ за Косово. Иако беше ставен на „стоп-листа“ по наредба од јавен обвинител, беше пропушен од полициијата. Тој бил во друштво на бизнисменот и почесен конзул на Косово Арсим Папранику. Внатрешната контрола при МВР утврдила дека полицискиот службеник ги завел Груби и Папранику дека пешки ја минале границата, не го евидентирал возилото и не почекал системот да јави дали има активна мерка.

Од СДСМ обвинија дека, ВМРО-ДПМНЕ го пушти Груби да избега и атоа сметаат дека одговорноста за бегството е целосно кај нив.

„ВМРО-ДПМНЕ треба да каже кој е политичкиот договор и цена за пуштањето на Груби? Зошто ВМРО-ДПМНЕ и Тошковски молчат за тоа дека „случајно“ не работеле камерите, „случајно“ полицајците не знаеле кого треба да проверуваат, „случајно“ згрешил службеникот на границата инаку кадар на Тошковски“, велат во СДСМ.

СДСМ велат дека откако е ВМРО-ДПМНЕ на власт е Косовсклата граница е главен канал за бегање на криминалците.