Skip to content
Во Хрватска, законската рамка потребна за воведување на задолжителна воена служба треба да биде презентирана во јуни, а усвоена во Парламентот во октомври оваа година, што значи дека обуката на првите регрути во касарните во Книн, Слуњ и Пожега ќе започне кон крајот на оваа година или најдоцна на почетокот на следната година, пренесува Хина.
Во касарните Книн, Слуњ и Пожега веќе се во тек подготовките за почеток на обуката, но потребно е да се промени законската рамка, која воведува задолжителна основна воена обука, а која ќе биде усвоена оваа година. Повеќе или помалку, веќе е договорено, но деталите за цивилна воена служба сè уште се „полираат“, за оние кои се изјаснуваат за приговор на совеста, дознава Хина неофицијално од владата.
Задолжителната основна воена обука ќе трае два месеци, а регрутите ќе добиваат 1.100 евра месечно за неа, вклучувајќи сместување и храна. Нивната обука ќе се признава како стаж и ќе се смета за предност за вработување во државните и јавните служби, што треба да биде мотивирачки аспект на воената служба. Вработените кои се на воена обука нема да можат да бидат отпуштени од работното место, а студентите ќе можат да добијат одложување за времетраењето на студиите, најдоцна до 29 години.
Оние кои ќе одбијат воена служба ќе имаат, како што моментално се замислува, две опции. Тие ќе можат да поминат тримесечна обука преку системот за цивилна заштита за дејствување во кризни ситуации, како што се пожари, поплави, земјотреси или да работат четири месеци за локалната самоуправа на комунални работи осум часа на ден.
Надоместокот ќе биде значително помал, но сите детали за државната служба сè уште не се финализирани.
Годишно, државата ќе испраќа пет покани за воена обука до 800 регрути, што би изнесувало 4.000 регрути годишно.
„Првите регрути ќе започнат со обука во касарната кон крајот на оваа година или најдоцна на почетокот на следната година“, беше кажано за Хина.
