Казна од 45 евра за непоседување на зимска опрема во возилата

Во зимски услови кога сообраќајот поради наноси на снег е отежнат, возачите да не поаѓаат на пат без задолжителната зимска опрема – зимски гуми и ланци, додека пак брзината треба да биде прилагодена на моменталната ситуација на патот. Ова се вообичаените  препораките на АМСМ, Јавното претпријатие за одржување на магистралните и регионалните патишта и ЦУК. 

Од Центарот за управување со кризи денеска информираат дека магистрален пат Крива Паланка-граничен премин Деве Баир  од 09:55 има забрана за тешки товарни возила поради  врнежи од снег. Истоа така тешко е прооден за теренски возила со зимска опрема, патниот правец Кратово – с.Близанци, с.Куново, с.Луково, с.Мушково, с.Нежилово до с.Каврак. Забранет е сообраќајот за тешки товарни возила и на патниот правец Тетово – Попова Шапка.               

Возачите, кои тргнуваат на пат, треба да знаат дека од 15-ти ноември 2024 година стапи на сила обврската за задолжително поседување на пропишана зимска опрема во моторните возила и мобилните машини. 

„Доколку не се почитуваат правилата за користење и носење зимска опрема во возилата, кои се предвидени во Законот за безбедност на патниот сообраќај, согласно истиот, на секој возач кој постапува спротивно на одредбите ќе му биде издаден платен налог со глоба во износ од 45 евра во денарска противредност“, пишува на веб страната на АМСМ.

Според законските одредби и Правилникот задолжителна зимска опрема, моторните возила со најголема дозволена маса која не надминува 3.500 килограми треба да поседуваат зимски пневматици – гуми на сите тркала со минимална длабочина на шарата од 4мм или доколку возилото поседува летни пневматици со минимална длабочина на шарата од 4мм да поседува синџири за снег кои одговараат на големината на погонските тркала.

Моторните возила со погон на сите тркала (4х4) треба да поседуваат зимски пневматици на сите тркала со минимална длабочина на шарата од 6мм или летни пневматици со минимална длабочина од 4мм доколку возилото поседува синџири за снег најмалку за задната осовина, во случај кога возилото има постојан погон на сите тркала или синџири за снег најмалку за погонските тркала кога возилото има преклопив погон.

Возилата кои имаат маса над 3.500 кг треба да имаат зимски пневматици на сите тркала со минимална длабочина на шарата од 6мм или доколку возилото има летни пневматици со минимална длабочина на шарата од 4мм, да поседува синџири за снег соодветни на големината на пневматиците. Автобусите и товарните возила кои не можат да постават синџири на тркалата задолжително треба да поседуваат зимски пневматици на погонските тркала како и прирачен алат, информираат од АМСМ.