Коцевски: Во предлогот за разрешување нема ниту еден основ за утврдување тешка дисциплинска повреда

Во предлогот за разрешување од Владата, нема ниту еден основ за тешка дисциплинска повреда која може да доведе до разрешување, смета јавниот обвинител Љубомир Коцевски.

Информираше дека предлогот за разрешување го добил во текот на вчерашниот ден и дека го разгледал документот со кој Владата сака да го разреши. Најави и дека своето мислење наскоро ќе го испрати до Советот на јавни обвинители.

„Во текот на вчерашниот ден доставен ми беше предлогот за разрешување од страна на Советот на јавни обвинители. Во еден разумен рок ќе се произнесам за сите точки. Останувам на тоа дека, од она што можев да го разгледам, е дека во предлогот нема ниедна основа за утврдување на тешка дисциплинска повреда“, изјави Љупчо Коцевски, Јавен обвинител.

Министерот за правда Игор Филков го стокми предлогот за разрешување со кое го терети Коцевски, за пристрасност и судир на интереси за кои требало да знае и да не постапува во тие предмети, но и затоа што бил одговорен за нарушени меѓучовечките односи во обвинителството, а имало и корупција.

Во меѓувреме тече рокот од 15 дена во кои Советот на јавни обвинители треба да изгради став по барањето за разрешување. Во овој период се чека и одговорот од Коцевски, за советот да може да усвои позитивно или негативно мислење за владиниот предлог за разрешување на републичкиот обвинител.

Коцевски вели, зачуден сум од содржината на кривичната пријава од суспендираниот виш обвинител, Хајрулахи.

„Од она што го слушнав од медиумите до сега, тоа е навистина чудна кривична пријава, барем ако е тоа содржината дека наводно сите тројца обвинители се теретат за некакво соизвршителство, затоа што јавниот обвинител во Штип постапувал по предмет односно за кривично дело по член 143 за коешто е предвидена казна, за кое што е нужно да се води истрага. Тоа не може во никој случај да биде никаков основ за кривична одговорност“, вели Коцевски.   

Според законот за јавно обвинителство, државен јавен обвинител може да биде разрешен ако е член на политичка партија или со својата работа сторил тешка дисциплинска повреда.

Последниот збор за судбината на Коцевски ќе ја има Собранието. За негово разрешување потребни се 61 пратенички глас.