Конференција за превенција од сајбер насилство врз жени и девојчиња

Темата на денешната Конференција, која се одржа во македонското Собрание, беше „Превенција и заштита од насилство врз жени и девојчиња, со фокус на сајбер-насилство. Пренесување на препораките од претходното на новото Собрание“.

Претседателката на Комисијата за еднакви можности на жените и мажите, Жаклина Пешевска, посочи дека истражувањето на УН Вомен, „Темната страна на дигитализацијата“, направено во окотомври 2024, во кое учествувале 12.000 жени од 13 земји од регионот, покажало дека Македонија е рангирана на 4 место, при што 63 % од учесничките се изјасниле дека барем еднаш се соочиле со онлајн насилство.

„На глобално ниво се проценува дека 736 милиони жени биле изложени на физичко или сексулано насилство и податоците покажуваат од истражување од три средни училишта во земјава дека 78 % од испитаниците биле жртви на вознемирување во онлајн просторот.  Немаме официјални статистики и прецизна евиденција, бидејќи не е регулирано во Кривичниот законик и немаме вкупен број на пријавени случаи“, рече Пешевска.

Во своето обраќање, претседателката на државата, Гордана Сиљановска Давкова, потенцираше дека насилството врз жените и девојките, претставува злосторство, кое ги надминува границите, културите и социо-економскиот статус.Поради сето тоа,  според Сиљановска Давкова, борбата бара обединета акција.

„Крајно  време е сите да ја оспориме неправдата и да покажеме дека безбедноста  и достоинството на жените и девојчињата не е привилегија, туку е право и дека заслужуваме ова право да се оствари“, рече Сиљановска Давкова.

Државната советничка во Мнистерството  за социјална политика демокрафија и млади, Елена Грозданова, рече дека главен приоритет на Министерството е зголемување на фокусот на превенцијата, за што се потребни повеќе пари и човечки ресурси.

Извршната директорка на македонското женско лоби, Даниела Димитриевска, посочи дека сајбер насилството е со галопирачки раст, затоа што се повеќе луѓе ги користат социјалните медиуми за идентификација, претставување, самореализирање.

„Овој простор кој е ширум отворен, е отворен и за насилство на најразлични групи на граѓани, посебно врз жените, со оглед на тоа дека младите жени целиот свој живот и врски ги остваруваат преку социјалните мрежи“, рече Димитровска.

На Конференцијата за „Превенција и заштита од насилство врз жени и девојчиња, со фокус на сајбер-насилство. Пренесување на препораките од претходното на новото Собрание“, беа донесени и заклучоци, препораки и следни активнсти, кои генерално беа фокусирани на превенцијата за заштита од насилство на девојчињата и жените.