Костадиновска до Дурмиши: Место бедни 1800 денари, кога ќе ја качите минималната плата на 500 евра?

Пратеничката на СДСМ, Бисера Костадиновска, на денешната собраниска седница посветена на пратенички прашања, упати прашање до министерот за економија и труд, Бесар Дурмиши, кое се однесуваше на како што рече ‘срамната одлука на Владата за покачување на минималната плата , со бедни 1.800 денари, но и одбивањето да се зголеми минималната плата за 500 евра’?

Прашувајќи го Дурмиши, ‘Зошто одлуката е донесена без работниците и работодавците, и дали како Влада конечно ќе го прифатат предлогот за зголемување на минималната плата на 500 евра или ќе продолжат да си играат со судбините на работниците’, рече дека власта не е свесна за економската состојба во последните 10 месец бидејќи со растот на цените, животот стана луксуз.

„Платите останаа срамно ниски, а потрошувачката кошница во февруари 2025 достигна 63.773 денари, односно за 100 евра е зголемена споредено со лани. Две минимални плати не се доволни за да се покријат основните месечни трошоци на едно семејство. Народот е принуден да бира, храна или сметки“, рече Костадиновска.

Костадиновска потенцираше дека како одговор на оваа катастрофа се ‘донесе една срамна и навредлива одлука, зголемувања на минималната плата за бедни 1800 денари и тоа без консултација со синдикатите, без социјален дијалог, без трошка совест, мислејќи дека ќе ги покријат зголемените зени на основните проиводи кои вие сами ги дозволивте со вашите лоши мерки’.

„За разлика од вас СДСМ покажа што значи да се грижи за народот. Докажавме дека минималната плата може и мора да расте. Во нашиот мандат минималната плата беше зголемена неколкукратно, носејќи вистинска помош за работниците и нивните семејства. Ја покачивме платата со јасна стратегија и законски решенија кој вие сега ги уништувате. СДСМ го цени трудот на народот и затоа секогаш работевме за економски развој кој е фер за сите, а не само за богатите елити“, рече Костадиновска.

Костадиновска посочи дека наспротив ваквите мерки на СДСМ, власта си игра со трпението на граѓаните.

„Свесно ги туркате во бездна, на раб на сиромаштија за да може да ги контролирате и манипулирате. Оттука моето прашање до вас министре е: Зошто оваа одлука ја донесовте без работниците и работодавците, и дали конечно ќе го прифатите предлогот за зголемување на минималната плата на 500 евра или ќе продолжите да си играте со судбините на работниците“.