Kостадиновска – Стојчевска до Минчев: Зошто нема вработување на лектори по македонски јазик?

Пратеничката на СДСМ Бисера Костадиновска – Стојчевска на денешната собраниска седница посветена на пратенички прашања, упати прашање до министерот за јавна администрација, Горан Минчев, кое се однесуваше на систематизација за вработување лектори по македонски јазик. Појаснувајќи го прашањето Костадиновска – Стојчевска праша:

„Членот 6 став (1) од Законот за употребата на македонскиот јазик пропишува задолжителна употреба на македонскиот стандарден јазик и неговото кирилско писмо во работата на органите на законодавната, извршната и судската власт, јавните установи, органите на единиците на локалната самоуправа и другите правни лица основани со Устав и со закон. Во таа насока, членот 9 од истиот закон изречно предвидува дека во наведените институции задолжително треба да се вработат лектори по македонски јазик, со цел да се обезбеди стручна лингвистичка поддршка, да се гарантира правописна и граматичка исправност на службените документи и да се спроведе обврската за лекторирање како што е предвидена со член 7 од законот. Дополнително, член 41 став (2) од законот утврдува дека рокот за исполнување на оваа обврска е една година од денот на влегувањето во сила на законот, што значи дека сите институции имаат ограничен временски период за усогласување со оваа законска норма“, посочи таа.

Костадиновска – Стојчевска потенцираше дека со оглед на тоа што Законот е донесен на 26 јануари 2024 година поминати се сите законски рокови за негова имплетација по ова прашање.

„Колку органи на државната власт, органи на единиците на локалната самоуправа, јавни установи, институции и правни лица основани со закон досега имаат поднесено барање за проширување на актите за систематизација со цел вработување лектор по македонски јазик, колку од нив добиле одобрение, во колку институции веќе е реализирано вработувањето и кои институции сè уште немаат преземено активности во таа насока, имајќи ја предвид законската обврска утврдена во член 6 став (1) и член 9 од Законот за употребата на македонскиот јазик („Службен весник на РСМ“ бр. 21/2024)?“, праша пратеничката на СДСМ.

Минчев, не на ова прашање не даде одговор.