Крај на ерата на јагленот во Финска! Затворена е последната термоцентрала, загадувањето во главниот град намалено за 50 отсто

Финската енергетска компанија Хелен ја затвори последната активна централа на јаглен во земјата, со што дојде „крајот на ерата на јаглен“ за оваа нордиска земја.

Електраната „Салмисари“ произведуваше топлинска и електрична енергија за Хелсинки, а нејзиното затворање ќе ги намали емисиите на стакленички гасови и ќе го запре поскапувањето на струјата.

Се проценува дека годишните емисии на јаглерод диоксид од електраната ќе се намалат за 50% во споредба со 2024 година, додека вкупните емисии во главниот град на Финска ќе се намалат за 30%, се вели во соопштението на енергетската компанија.

Нарекувајќи го „крај на ерата на јаглен“ и чекор кон почиста, самодоволна и попристапна енергија, компанијата рече дека затворањето на централата исто така значи дека вкупните емисии на Финска ќе се намалат за речиси два отсто во споредба со минатата година.

Компанијата, сепак, ќе продолжи да ги чува резервите на јаглен во складиште и да ги користи „ако е потребно“.

Во 2019 година, Финска одлучи да ја забрани употребата на јаглен во производството на енергија од 1 мај 2029 година. Од 2020 година, капацитетот на енергијата на ветерот во земјата е повеќе од двојно зголемен, од кој сега се произведува една четвртина од електричната енергија.

Во истиот период, производството на јаглен падна за 73% и сега сочинува помалку од еден процент од енергетскиот микс.