Култна фотографија од протестот во Белград го обиколи светот

Митингот на белградскиот плоштад Славија, еден од најголемите во последните години, го свикаа студентите и синдикатите на земјоделците. Ова е дел од поширокото социјално движење кое бара одговорност за уривањето на настрешница на железничката станица на северот од земјата на 1 ноември, во која загинаа 15 лица, објави АП, додавајќи дека помали протести се одржале и во Ниш и Крагуевац.

Многумина во Србија за падот на настрешницата на Железничката станица во Нови Сад, ја обвинуваат „широката корупција и неуредното работење на зградата на железничката станица во Нови Сад, која беше реновирана двапати во последните години во рамки на сомнителни мега-проекти во кои учествувале кинески државни компании“. 

Демонстрантите бараат Вучиќ и одговорните да бидат изведени пред лицето на правдата, додаде АП. 

На протестот се приклучија и популарните српски театарски и филмски актери, а актерот Бане Трифуновиќ вчерашниот митинг го опиша како „фестивал на слободата“, пишуваат странските медиуми. 

Во својот извештај од протестот, француската агенција АФП пренесува дека српската влада е под притисок повеќе од седум недели поради протестите по трагедијата во Нови Сад, а многу демонстранти ги обвинуваат властите за корупција и немање контрола. Митингот во Белград, кој го организираа студенти, започна со 15-минутно молчење во чест на 15-те загинати, а меѓу присутните имаше земјоделци, актери и други граѓани од цела Србија. Демонстрантите го окупираа Плоштадот Славија и го блокираа речиси целиот центар на градот. Тие побараа оставка од премиерот Милош Вучевиќ и градоначалникот на Нови Сад по несреќата, како и кривично гонење на одговорните. Студентите бараат и лицата кои ги нападнаа на претходните протести да бидат кривично гонети и да се отфрлат обвиненијата против нивните колеги кои учествуваа на митинзите. Српскиот претседател Александар Вучиќ во саботата изјави дека нема да попушти пред демонстрантите. Во исто време, тој го охрабри обезбедувањето субвенции за купување станови или куќи за млади луѓе, што многумина го гледаа како обид за смирување на тензиите, додава АФП. 

АП објави дека вчера Вучиќ свечено го отворил делот од новоизградениот автопат во централна Србија, каде што изјавил дека нема да попушти пред барањата на опозицијата за преодна влада и ги обвини своите противници дека ги користат студентите за преземање на власта. 

Српските медиуми пишуваат дека врз основа на достапните снимки и фотографии, Архивата на јавните собири утврди дека на протестот организиран од студентите во Славија се собрале меѓу 100.000 и 102.000 луѓе. Како што објавија на социјалната мрежа Х, снимките со кои се пребројуваа учесниците се снимени во периодот од 16:45 до 17:00 часот. Од друга страна, оценката на МВР на Вучиќ, која претходно соопшти дека денешниот народен собир во Белград почнал околу 15 часот и 15 минути, а во моментот кога посетеноста била најголема, во 16 часот и 40 минути имало меѓу 28.000 и 29.000 граѓани. Како што пишува Нова рс, очигледно МВР со официјално соопштение се збунило и погрешно го проценило бројот на присутните – според Архивата на јавни состаноци, бројот на граѓани бил повеќе од три пати поголем од официјалната проценка. 

По завршувањето на протестот на плоштадот Славија, студентите упатија порака до сите граѓани на Србија: „Останете со нас, само што почнавме!“