Мерц: Германија и САД се блиску до договор за испорака на „Патриот“ за Украина

За време на посетата на Лондон денеска, Мерц рече дека министрите за одбрана на земјите во моментов преговараат за техничките детали, опишувајќи ги нивните разговори како „многу конкретни“.

-Тие исто така мора да бидат транспортирани и поставени. Тоа не е прашање на часови. Тоа е прашање на денови, можеби недели, рече канцеларот.

Системите „Патриот“ можат да се користат за пресретнување на непријателски авиони, балистички ракети и крстосувачки ракети.

Целите можат да бидат погодени на растојание од околу 100 километри и на височини до 30 километри.

Коментарите на Мерц доаѓаат по посетата на германскиот министер за одбрана Борис Писториус на Вашингтон во понеделникот, за време на која се сретна со американскиот министер за одбрана Пит Хегсет.

Првичниот план на Германија беше да купи два системи „Патриот“, секој по цена од околу една милијарда евра (1,16 милијарди американски долари) од САД и да ги достави директно во Украина.

Сепак, бидејќи системите сè уште не се достапни, вооружените сили на Германија сега планираат да предадат два од своите девет преостанати системи „Патриот“ на Украина, а подоцна да добијат замена од САД.