Мицкоски и трговците се уортачија против граѓаните, нема мерки против скапотијата

Владата предводена од Христијан Мицкоски ја одложи примената на мерката за замрзнување на маржите, со што според СДСМ, нема капацитет да се справува со економските предизивици. Посочуваат дека, Мицкоски осум месеци, колку што е на власт, не донесе ниту една мерка за заштита на стандардот на граѓаните, освен што најави мерката од СДСМ, за замрзнување на маржите.

„Уплашениот и уценет премиер, за само еден ден реши да ја одложи мерката откако му се заканија трговците. Мицкоски е политичка кукавица која нема храброст да спроведе ништо во интерес на граѓаните. Заканите од трговците за отпуштање на 5000 работници се директна последица на неспособноста на Владата на ВМРО-ДПМНЕ да води економска политика која ќе ги заштити граѓаните, но и ќе обезбеди стабилност за работниците и компаниите. Така е кога Мицкоски наместо да биде лидер, глуми набљудувач во државата која ја води“, велат од СДСМ.

Од Стопанската комора на трговци на големо и мало претежно со прехранбени и непрехранбени производи, пијалоци и тутун која основана на Основачко собрание одржано на 10 февруари и е во фаза на упис во Централниот регистар, преку соопштение информираа дека се сретнале со премиерот Христијан Мицкоски.  

Во соопштението тие пишуваат, дека одлуката за замрзнување на маржите ќе го доведе во прашање опстанокот на трговците и тие ќе бидат принудени да ги отпуштаат вработените, но и да ги затвораат маркетите. Штетите, според Комората, ќе бидат големи, бидејќи во прашање се доведува опстојувањето на 86 трговски фирми со 790 продавници и 4 700 вработени.

Од СДСМ, пак, информираат дека додека биле на власт, успевале да донесат мерки кои ја контролираа ценовната криза без да се дозволи отпуштања или штета по компаниите и се затоа што преговараврале за издржани фер одлуки за сите, и за граѓаните, и за работниците, и за компаниите.

„За разлика од нас, Владата на ВМРО-ДПМНЕ осум месеци одбиваше да преземе било каква акција за контролирање на цените. Кога конечно се одлучи на замрзнување на маржите, тоа го направи без концепт без целосен пакет решенија како што нудиме ние и без јасен план како да се заштитат работниците. Граѓаните веќе плаќаат цена за неспособноста на Мицкоски. Затоа им порачуваме да ги прифатат овие решенија како пакет мерки кои се во интерес на граѓаните и стопанството“, велат од СДСМ.

По вртоглавиот раст на цените на храната и двата граѓански бојкота, Владата во вторникот на седница го задолжи Министерството за економија да ја подготви Предлог-одлуката којашто, според најавите, требаше да се одржи вчера на итна седница, но тоа не се случи. Со предлог-одлуката требаше да бидат опфатени основните прехранбени производи на истите 73 групи на производи кои беа во претходните кошници, но и детергентите, бебешката храна и други непрехранбени производи кај кои е забележана многу висока маржа, а се дел од основните потреби на граѓаните.

Ваквата одлука се темелеше на шестмесечниот извештај од Државниот пазарен инспекторат, според кој кај трговците на мало беше утврдено дека има над 20 отсто маржа на основните прехранбени производи и над 30 отсто маржа кај средствата за лична хигиена, додека кај увозниците и дистрибутерите се евидентирани повисоки маржи кои одат дури и до 50 отсто.

Владата вчера не ја донесе одлуката за 10-процентно ограничување на маржите во трговијата на мало и големо што требаше да важи до 30 април и да опфати над 100 групи производи откако Стопанската комора на трговци на големо и мало вчера побара итна средба во врска со одлуката за ограничување на маржите. 

„Во целост ја оспоруваме одлуката за ограничување на маржите на 10 проценти. Со ваква маржа нема да можеме да опстоиме. Ќе мора да донесуваме рестриктивни одлуки за отпуштање на нашите вработени, за реструктурирање на работењето и за затворање на маркетите. Затоа, бараме итно да се најде заедничко решение. Посочуваме да се земат предвид анализите кои покажаа дека маркетите не се одговорни за зголемувањето на цените, туку ценовната политика ја водат доставувачите и производителите. Потенцираме дека никогаш не ги зголемуваме цените самостојно, туку промената се случува поради промените на цените на производителите или доставувачите и токму поради ова маркетите се под постојан притисок да се прифатат новите ценовници. Ако тоа не се направи, не се испорачуваат производите. Од ова произлегува притисокот врз маркетите и од потрошувачите или за цените или за недостигот на производи. Само во јануари до маркетите се пристигнати ценовници од над 40 доставувачи и производители во 92 категории и поткатегории производи. Профитната маржа кај маркетите од година во година опаѓа, а кај нив се зголемува“, наведе Комората.

Лидерот на СДСМ Венко Филипче, оцени дека мерките за ограничување на маржите се задоцнети и предвремено најавени, што, како што посочи, остава простор за трговците да се прилагодат. Ограничувањето на маржите како единствена мерка, според него, нема да даде ефект. Затоа предложи седум мерки. 

„Предлагаме намалување на ДДВ на струја од 18 на 5 проценти, намалување на ДДВ на основните прехранбени производи, замрзнување на цените на основните прехранбени производи во следните три месеци, фиксирање на маржите на основните прехранбени производи, итно имплементирање на Законот за нефер трговски практики, намалување на цената на зелениот картон за автомобили и зголемување на платите во приватниот сектор со замрзнување на придонеси“, рече Филипче.