Мицкоски ја изгуби битката со трговците, граѓаните ја  презедоа во свои раце, ќе ги бојкотираат маркетите

Граѓаните во свои раце ја презедоа битката со трговците и енормното зголемување на цените на производите кои сопствениците на големите ланци на маркети ги диктираат. 

Преку социјалните мрежи се самоорганизираа во петок (31 јануари) да ги бојкотираат големите продавници. Дел, пак, на социјалните мрежи напишаа дека бојкотот да се прошири и на кафулиња, банки, бензински пумпи итн. 

Премиерот Христијан Мицкоски, денеска рече дека со зголемувањето на цените кај одредени маркети гледа ‘напад врз стандардот на граѓаните’.

„Сите треба да знаат дека сме сериозни и овој напад го сфаќаме како напад врз стандардот на граѓаните, а Владата има право и обврска да го штити јавниот и интересто на граѓаните“, рече Мицкоски . 

Тој додаде, дека на координација со министерот за економија и труд, претседателот на Комисијата за заштита на конкуренцијата и директорот на Државниот пазарен инспекторат, биле договориле чекори кои ќе содржат ригорозни контроли во маркети и во други трговски објекти.

Изјавата на Мицкоски за битката со трговците, опозициската СДСМ ја протолкува како уште една во низата, бидејќи истата со месеци наназад ја најавува, особено по неуспехот на т.н. мерка „новогодишна кошничка“, која наместо помош за граѓаните, предизвика спротивен ефект – екстра покачување на цените на производите во маркетите.

Инаку, Мицкоски и вчера рече дека ‘во интерес на граѓаните’ од почетокот зборувал за однесувањето на луѓето во овој бизнис, дека на шпекулативен начин се обидувале да генерираат високи профити и дека институциите, пазарните инспекторати ја следеле ситуацијата

Од друга страна пак, и лидерот на СДСМ Венко Филипче, смета дек најавениот бојкот е најголем пораз на погрешните политики на власта и кулуминација на незадоволството на граѓаните.

„За жал, лицемерието на Мицкоски и ДПМНЕ го достигна врвот. Откако лично тој и неговата партија дозволија цените во маркетите да пораснат до небо и не преземаа ништо, сега ќе давале поддршка на бојкотот на маркетите“, напиша на фб Филипче.

Од СДСМ, денеска посочија дека и покрај  нивните предупредувања, во изминатите месеци, власта на чело со ВМРО-ДПМНЕ ги лаже граѓаните со шарени ПР кампањи. Според социјалдемократите, ова не е само бојкот против маркетите, туку и ‘бунт против нечесната власт која со својата неспособност и алчност дозволи народот да биде ограбен’.

„Со месеци цените растеа до небо, граѓаните едвај преживуваа од плата до плата, а власта на ВМРО-ДПМНЕ немо стоеше и гледаше како трговските ланци ги цицаат парите на луѓето. Сега кога тие сами се кренаа, тие глумат дека се на негова страна. Со месеци ја повикувавме власта да преземат мерки, да ги сопре маркетите во нивната бескрупулозна алчност, да донесат конкретни решенија што ќе го олеснат животот на граѓаните. Наместо тоа ВМРО-ДПМНЕ молчеше и ги лажеше со шарени ПР кампањи, а сега кога граѓаните се бесни и решија самите да се борат, тие сакаат да се вклучат во борбата како нивни спасители“, велат во СДСМ.

СДСМ, ја повика ВМРО-ДПМНЕ да ги прифати мерките кои ги предлагаат, бидејќи со сигурност ќе го решат проблемот а тие се укинување на ДДВна храна, да се покачи минималната плата и да се покачат платите во другите сектори. 

Опозицијата ја поздрави храброста на граѓаните да се самоорганизираат со преземање на работите во свои раце.