Skip to content
На денешната владина седница паднала одлука да се почне постапка за разрешување на Државниот јавен обвинител Љупчо Коцевски, со што Министерството за правда треба да ја почне постапката. Од Владата на Христијан Мицкоски информираат дека за „грев“на Коцевски му го земаат, последното именување за вршител на должност шеф на Вишото Јавно обвинителство во Скопје било незаконска и надвор од одредбите пропишани во Законот за јавното обвинителство.
Од друга страна пак извори во судската фела коментираат дека одлуката на Владата е класично непознавање на законите и сметаат дека на Коцевски му импутира дека ставил вршител на должност Виш обвинител на Скопје, а тој, вушност, назначил привремен раководител, бидејќи Мустафа Хајрулахи е тргнат поради кривична пријава и поради почната дисциплинска постапка против него.
По ваквата одлука на Владата со писмен допис до јавноста се јави и Коцевски, во кое вели дека секогаш работел согласно закон.
„Од она што имав прилика да го прочитам по медиумите, причина за одлуката на Владата била тоа што изборот на раководител на Вишото јавно обвинителство Скопје бил наводно незаконски. Верувам дека Владата ги немала на располагање сите релевантни и точни информации и заради избегнување на недоразбирања, сакам да го појаснам следното: Распоредот за работа на Вишото јавно обвинителство Скопје, донесен од обвинителот Хајрулахи, кој во моментов е суспендиран, беше со важност до 31.12.2024 година. Согласно тој распоред лицата определени за негови заменици го имаа статусот на заменик до истекот на распоредот на 31.12.2024 година. Распоредот за работа на Вишото јавно обвинителство Скопје за 2025 година е донесен од обвинителот Цветановски во јануари 2025, во момент кога истиот немал својство ниту на заменик, ниту на шеф на Вишото јавно обвинителство Скопје, што значи дека ваквиот распоред не е донесен согласно закон и не може да произведува правно дејство. Со потврдување на одлуката за суспензија и на обвинителот Цветановски, се јави потреба да се определи јавен обвинител кој времено ќе раководи со Вишото јавно обвинителство Скопје, посочува Коцевски.
Во писмената изјава Коцевски вели дека не е првпат да се постапува на овој начин и дека приоритет било да се определи раководител на Вишото јавно обвинителство Скопје кој ќе биде гарант за непристрасното, професионално и објективно работење на обвинителството до завршување на дисциплинска постапка за обвинителот Хајрулахи.
„Појаснувам дека не се работи за назначување на вршител на должноста виш јавен обвинител, туку за определување на времен раководител на вишото јавно обвинителство Скопје. Според тоа ве верувам дека моето постапување во овој случај, како и во целокупното мое работење е согласно закон, а со цел овозможување на непречено и законито функционирање на јавното обвинителство и заштита на јавниот интерес, наведува Коцевски.
