Skip to content
Растот на невработеноста во Германија најмногу се гледа во затворањето на работните места во индустријата, кои традиционално се подобро платени. Експертите посочуваат дека месечно се губат повеќе од 10.000 работни места во индустријата, особено во автомобилскиот сектор, кој е дополнително погоден од новите американски царини за увоз на автомобили. Но, и без тие царини, германската индустрија е во криза и се повеќе компании го преселуваат своето производство во странство. Како што велат, доминантна причина за тоа се производствените трошоци.
Поточно, од избувнувањето на војната во Украина, бизнисмените се оптоварени со високите цени на струјата, гасот и нафтата, потоа зголемените даноци, но и еден стар проблем – комплицирана и гломазна бирократија.
Сепак, Германците го преместуваат производството во Азија поради повисокото ниво на роботизација и автоматизација на производството таму.
„На колегите во другите делови на светот им прикажувам филмови од нашите кинески фабрики, поради високиот степен на автоматизација, стандардизација, роботизација. Развојот во Кина во последните шест, седум години е извонреден во однос на воведувањето на технологија во производството. Во изминатите неколку години, инвестиравме една милијарда јуани во производствен капацитет во Кина. И ќе продолжиме така“, вели Мигел Борего, генерален директор на Тисен-Крупа.
Како Германија планира да го финансира економскиот пресврт?
Индустријалците сметаат дека на Германија и треба пресврт во трката за инвестиции. Токму такви реформи ветува најверојатниот иден германски канцелар Фридрих Мерц. Уште пред да стане канцелар, тој успеа да го натера старото свикување на Бундестагот да ги усвои уставните измени, кои ќе и овозможат на неговата влада да позајми повеќе од 1.000 милијарди евра во наредните години и тие пари да ги искористи за вооружување, инфраструктурни и климатски проекти.
„Војната и очекувањето на воената неопходност се користат како привремен лек за германската економија. Но, тоа е лош знак. Секогаш мораме да запомниме дека воените трошоци на крајот се поддржани со даноци. Ако сакаме да ги зголемиме воените инвестиции, мора да ги зголемиме даноците за поединци и економијата или да ги намалиме другите трошоци и приоритети, како што се образованието, истражувањето и развојот. Тоа се области кои ја одржуваат конкурентноста на економијата на долг рок. Длабоко жалам за политиката на владата по ова прашање“, вели Рајнер Ротфус, пратеник на АфД во Бундестагот.
Во Германија, се чини дека постои согласност дека нејзината економија се лизга во деиндустријализација, освен во секторот за производство на оружје. Но, се погласно се слуша дилемата дали Германија всушност го менува моделот на економски успех со тоа што во иднина наместо автомобили ќе произведува и извезува тенкови.Reply
