Skip to content
Европските сојузници на Романија и денеска ја поздравија победата на центристот, проевропскиот градоначалник на Букурешт Никушор Дан, над евроскептичната екстремна десница, во вториот круг од претседателските избори во Романија. Тие не ги сокрија чувствата на олеснување што членката на ЕУ избегна да тргне по политички пат инспириран од американскиот претседател Доналд Трамп, додека Русија објави дека тоа е „најмалку речено – чудно“, пишува Ројтерс.
Ден, 55-годишен математичар и градоначалник на Букурешт, со благи зборови, освои 54 отсто од гласовите и го победи својот ривал Ѓорѓе Симион, гласен обожавател на Трамп чие силно претставување во првиот круг на гласање овој месец ги вознемири сојузниците и инвеститорите, соопшти агенцијата, додавајќи дека романскиот леи денес добил на вредност повеќе од еден отсто, а романските обврзници деноминирани во евра се опоравиле.
За време на кампањата, Дан се залагаше за борба против корупцијата, одржувајќи ја поддршката за Украина и држејќи ја земјата цврсто во европскиот мејнстрим.
Спротивно на тоа, Симион, 38-годишен националист, го критикуваше раководството на ЕУ и се спротивстави на воената помош за Украина, а неговиот цврст став пред вториот круг од изборите во недела предизвика пад на романската прозападна коалициска влада.
Претседателката на Европската комисија, Урсула фон дер Лајен, беше меѓу првите кои му честитаа на Дан.
„Романскиот народ масовно излезе на гласање… Го избра ветувањето за отворена, просперитетна Романија во силна Европа“, соопшти мрежата Х.
Повторувајќи го тоа, претседателот на Европскиот совет, Антонио Кошта рече дека ја поздравува соработката со Дан.
„Од градското собрание до масата на Европскиот совет… Ова е силен сигнал за посветеноста на Романците кон европскиот проект“, рече тој.
Претседателката на соседна Молдавија, Маја Санду, го нарече изборниот резултат „чекор напред за демократските вредности и заедничкиот европски пат“.
По години на зголемување на националистичките чувства кај граѓаните во Европа, во ЕУ имаше нелагодност од изгледите за промена на крајната десница во Романија, а аналитичарите предупредија дека победата на Симеон може да предизвика Романија да стане изолирана во странство и да го дестабилизира источното крило на НАТО.
Доналд Туск, премиерот на Полска, каде што во вториот круг од претседателските избори на 1 јуни ќе се соочат центристичкиот градоначалник на Варшава Рафал Трзашковски и националистот Карол Навроцки, ги поздрави резултатите од романските избори, како и францускиот претседател Емануел Макрон и германскиот канцелар Фридрих Мерц.
„И покрај бројните обиди за манипулација, Романците вечерва избраа демократија, владеење на правото и ЕУ“, напиша Макрон на Инстаграм, на романски јазик.
Од друга страна, Кремљ денеска ги оцени како чудни претседателските избори во Романија, наведувајќи дека прорускиот кандидат, кој минатата година победи на поништеното гласање, е неправедно дисквалификуван.
„Изборите беа, благо кажано, чудни…“, рече портпаролот на Кремљ, Дмитриј Песков, додавајќи дека „кандидатот кој имаше најголеми шанси за победа… без никаков напор да најде оправдување, едноставно беше насилно отстранет од трката“.
