Началниците на генералштабовите на Франција и Британија се сретнаа со Зеленски во Киев

Началниците на Генералштабот на вооружените сили на Франција и на Велика Британија, генерал Тиери Буркхарт и адмиралот Ентони Радакин, во Киев се сретнаа со украинскиот претседател Володимир Зеленски и военото раководство на Украина на разговори за можното распоредување на европските мировни сили во Украина по завршувањето на конфликтот.

Ова го соопшти Буркхарт на платформата „X“, наведувајќи дека се сретнал и со министерот за одбрана Рустем Умеров и со врховниот командант на вооружените сили Александар Сирски.

Буркхарт истакна дека целта на состанокот е „да се утврди долгорочна стратегија за реконструкција и трансформација на моделот на (украинската) армија“, што е главната гаранција за безбедноста на земјата.

Тој нагласи дека се разгледуваат опции за спроведување меѓународни безбедносни гаранции за Украина.

-Заедно се стремиме да гарантираме стабилен и траен мир во Украина – неопходен услов за безбедноста на европскиот континент, рече Буркхарт.

Заменик-шефот на кабинетот на украинскиот претседател Павло Палиша изјави дека 10 до 12 земји се подготвени да се приклучат на „коалицијата на подготвените“ во некоја форма, пренесоа украинските медиуми.

На 27 март во Париз се одржа состанок на „коалицијата на подготвените“, а главна тема на состанокот беше продолжувањето на помошта за Украина и дискусијата за структурата на идните безбедносни гаранции за Украина по завршувањето на војната.