Нема повеќе евтини стоки од апликациите! Америка ги заострува тарифите

Американскиот претседател Трамп дополнително ја засили глобалната трговска војна, која предизвика остар пад на вредноста на акциите на водечките технолошки компании.

Вчера беа избришани околу 2.400 милијарди долари од пазарната вредност на компаниите од составот на индексот S&P 500. Меѓу најголемите губитници беа акциите на технолошките гиганти – цената на Apple падна за 9,2 отсто, на Amazon за 9, а на Nvidia за речиси осум отсто.

Пазарните анализи го покажуваат различното влијание на новите царински оптоварувања врз технолошкиот сектор – додека некои индустрии гледаат придобивки, други се соочуваат со сериозни предизвици.

Индустријата за полупроводници е една од ретките што е изземена од новиот тарифен план, покажуваат официјалните податоци на администрацијата на Трамп, пишува Euronews Next. Taiwan Semiconductor Manufacturing Co. (TSMC), клучен снабдувач во областа на вештачката интелигенција, нема да биде покриен со тарифата од 32 отсто наметната за повеќето стоки од Тајван.

TSMC ги снабдува американските технолошки гиганти како Nvidia со полупроводници кои се клучни за развојот на вештачката интелигенција, вклучувајќи ги и технологиите што ги напојуваат OpenAI и Google chatbots. Постои можност и холандската ASML, водечки производител на опрема за производство на полупроводнички чипови, да биде ослободена од тарифата од 20 отсто за стоки од Европската унија, но тоа се уште не е потврдено.

На почетокот на овој месец, TSMC најави дополнителни инвестиции од 100 милијарди американски долари (90 милијарди евра) во Соединетите држави, кои вклучуваат изградба на три нови фабрики, напреден капацитет за пакување и центар за истражување и развој во Аризона. Овој потег ќе ја донесе вкупната инвестиција на компанијата во САД на 165 милијарди долари (148,57 милијарди евра), што Белата куќа го опиша како „најголемата странска директна инвестиција во историјата на САД“.

ASML изјави за бизнис магазинот Fortune во декември дека американските тарифи веројатно нема да имаат значително влијание врз финансиските резултати на компанијата во 2025 година.

Во исто време со потпишувањето на новите царински мерки, претседателот Трамп издаде извршна наредба со која се става крај на трговската привилегија за пакетите од Кина и Хонг Конг, што директно ќе влијае на платформите за е-трговија како што се Shein, Temu и Amazon. Претходното правило de minimis им дозволуваше на кинеските платформи да испраќаат пакети директно до американските потрошувачи без да плаќаат давачки, под услов вредноста на пакетот да не надминува 800 долари (720 евра).

Според новата регулатива, за сите такви стоки ќе се плаќа царина од 30 отсто или 25 долари (22,51 евра) по артикал, а од 1 јуни царината ќе се зголеми на 50 долари (45,02 евра) по артикал, пишува Euronews.

Во наредбата на претседателот се вели дека Кина користи „прикриени методи за испорака“ и „прикрива нелегални супстанции“, вклучително и опијати, во пакети.

„Иако САД досега нудеа дарежливи de minimis исклучоци, Кина спроведува строги ограничувања на увозот… не покажувајќи слична попустливост кон американските стоки“, се наведува во документот.

Благодарение на досегашното ослободување, кинеските продавачи го зголемија својот пазарен удел на Амазон на повеќе од 50 отсто, додека американските трговци учествуваат со околу 45 отсто, според истражувачката компанија Маркетплас Пулс. Покрај тоа, Амазон неодамна воведе категорија на производи со многу ниски цени направени во Кина за да се натпреварува со Shein и Temu, што аналитичарите го толкуваа како адаптација на новите пазарни услови.