Невидена работа! Заедно со растот на цената на „новогодишната кошничка“ во декември, порасна и инфлацијата на 4,3%

Новогодишната кошничка во фокусот на денешните пратенички прашања, последни во оваа година. Пратеникот на СДСМ Љупчо Николовски го праша заменик министерот за економија Марјан Ристески, како граѓаните ќе ги намират трошоците за да ја наполнат новогодишната кошничка, која ја промовираше премиерот Христијан Мицкоски, кога Владата не планира да го прифати предлог законот за зголемување на минималната плата, поднесен од СДСМ.

„Во услови на растечка инфлација и трошоци за живот, сметаме дека фокусот треба да биде на зголемување на платите и растот на стандардот на граѓаните, што беше клучна политика во изминатиот период“, рече Николовски.

Николовски нагласи дека минималната плата не мрдна во изминатите 6 месеци, додека владата предводена од СДСМ ја покачи од 8 на 22.567 денари.

„Заводот за статистика евидентираше раст на инфлацијата од 4,3%, синдикалната кошничка во декември е повисока за 840 денари, изнесува близу 63.000 денари, потребни се три минимални плати за нејзино покривање. Секаде во регионот се зголемува минималната плата само кај нас не мрда. Зошто не прифатите да се покачи минималната плата за работниците“?, рече Николовски.

Според опозицијата новогодишната кошничка, на Мицкоски, чини неколку милиони евра грабеж врз граѓаните.

„Граѓаните многу скапо ги плаќаат погрешните политики на Мицкоски. Според нашите проценки, повеќе милиони евра е направен грабеж врз граѓаните во изминатиот период, токму заради оваа лоша политика на Мицкоски. Така да оваа штета веќе не може да се надомести. Луѓето се веќе осиромашени за новогодишните празници“.
Според СДСМ, за шест месеци колку што е ВМРО-ДПМНЕ на властл се живее полошо отколку во најголемите економски кризи, кога владата на СДСМ се грижеше за граѓаните.