Почна седницата на Уставен суд, судиите Кадриу и Ајдари не се присутни, а раководството на ДУИ и активности пред Уставен суд

Седницата на Уставниот суд закажана за денеска почна. Како што јавува Телма ТВ на седницата не се присутни судиите Кадриу и Ајдари како што и најавија.

Непосредно пред гласањето на дневниот ред предложен за оваа седница, судијата Фатмир Скендер предложи точката со иницијативите за оценување на уставноста и законитоста на Законот за употреба на јазиците да се одложи поради отсуството на двајцата судии.

-За овој предмет пожелно е да бидеме сите присутни да ги вкрстиме сите наши аргументи и ставови, рече судијата Скендер.

Останатите судии не се согласија со Предлогот и беше изгласано истиот да се одбие. Нивните аргументи беа дека доколку востановат таква пракса, тогаш ќе треба и за други предмети да се чека да бидат присутни сите, со што, како што посочија, ќе се кочи работата на судот. Воедно, аргумент беше дека и за други предмети досега одлучувале во отсуство и на други судии.

По одлуката, судијата Фатмир Скендер одлучи да не присуствува на расправата за првата точка од дневниот ред, односно за иницијативите за оценување на уставноста и законитоста на Законот за употреба на јазиците.

-Поради неможност моите ставови да бидат слушнати од отсутните судии, јас нема да присуствувам на расправата по првата точка, рече судијата Скендер.

Забележано е засилено присуство на безбедносни сили во центарот на Скопје. Во близина на Собранието, позади зградата, се паркирани оклопни возила „хермелини“.

Пред Уставниот суд, каде денеска се одржува седницата на која ќе се расправа по иницијативите за оценување на уставноста и законитоста на Законот за употреба на јазиците, се собираат членови и активности на Демократската унија за интеграција.

Меѓу нив се и членови на највисокото раководство на партијата како поранешниот министер за надворешни работи Бујар Османи и поранешниот министер за образование и наука Арбр Адеми. Присутни се и лидерот на партијата Али Ахмети и на Зијадин Села од Алијанса за Албанците. 

Од ДУИ вчера ги повикаа граѓаните да им се придружат. – Ова е одлучувачки момент за иднината на нашата мултиетничка и демократска држава.
Обединети и спокојни, да испратиме порака за важноста од почитување на еднаквоста, правдата и демократските вредности, стои во објавата на Фејсбук.