Skip to content
Кастел Гандолфо, мало гратче сместено на брегот на вулканско езеро, е оддалечено само 25 километри од Рим, а со векови било омилено одморалиште на папите.
Неговите вили, палати и импозантни цркви сведочат за долгата традиција поглаварот на Католичката црква да почива токму на ова место.
Иако папата Франциск не ја посетил летната резиденција во текот на 12-те години од неговиот понтификат, новоизбраниот папа Лав XIV одлучил да ја оживее традицијата и веќе пристигнал во Кастел Гандолфо на шестнеделен одмор.
Туристите што го посетуваат Рим ова лето сега можат да ги следат неговите стапки, во потрага по посвеж воздух, монументална архитектура и бајковити погледи на езерото.
Запознајте ја летната резиденција на папата
Областа околу езерото Албано е популарно место за пикник уште од античко време, дури и римските императори, како Домицијан во 1 век, барале одмор од жештината на градот тука.
Во 17 век, Кастел Гандолфо станал официјална летна резиденција на папите.
Во 1624 година, папата Урбан VIII ја започнал изградбата на папската палата, која во текот на следните векови била проширена на 55 хектари, што е повеќе од површината на целиот Ватикан.
Во текот на летните месеци, претходните папи редовно престојувале тука, а илјадници верници се собирале во дворот на палатата во неделите за да го видат пладневниот благослов.
Кога папата Франциск одлучил да остане во Ватикан во текот на летото, тоа првично му нанело сериозен економски удар на малото гратче. Сепак, потоа била донесена одлука да се отвори папската палата и градините како музеј кој работи преку целата година, предизвикувајќи нов бран на туризам.
Денес, посетителите можат да ги разгледаат бројните простории на палатата – судницата, стражарската соба на Швајцарската гарда, тронската сала, во која се чуваат уметнички дела и луксузен мебел.
Имотот има и фарма, ботаничка градина, опсерваторија управувана од језуити и образовен центар за заштита на животната средина, инспириран од енцикликата Лаудато Си од 2015 година.
Што друго да се види и прави во Кастел Гандолфо?
Освен папската палата, Кастел Гандолфо нуди многу повеќе.
Прогласен е за едно од најубавите села во Италија, па дури и едноставна прошетка низ стрмните улици е вистинско задоволство.
Благодарение на неговата положба, нуди спектакуларен поглед на темно сините води на езерото Албано.
На главниот плоштад, Пјаца дела Либерта, се наоѓа црквата Свети Тома од Виланова, дело на барокниот мајстор Џан Лоренцо Бернини.
Уживајте во еспресо во едно од кафулињата на плоштадот, потоа напишете разгледница и ставете ја во она што се верува дека е првото поштенско сандаче во светот, од месингана легура вградена во ѕидот на општината.
Ако сакате да се разладите, упатете се кон патот покрај езерото.
Од едната страна има ресторани и барови, а од другата плажни клубови. Можете да изнајмите велосипед за да ја разгледате околината или брод и кајак за да се возите околу езерото.
Кастел Гандолфо е лесно достапен од Рим.
Возовите од станицата Рим Термини тргнуваат речиси секој час на линијата Кастели Романи, а патувањето трае околу 45 минути.
