Skip to content
Водата повторно тече од чешмите во Скопје, откако денеска беа санирани дефекти и променети пет затворачи низ главниот град.
Санирањето на дефектите и модернизирањтео на главниот цевковод во Скопје се реализираше во планираните и најавени 15 часа од страна на ЈП Водовод и канализација.
Како што велат одговорните, денеска биле санирани пропусти поради кои скопскиот водовод трпел огромни загуби на вода изминативе 20 години.
Еден од поголемите дефекти кои се поправаа денес беше и на улицата Никола Парапунов во Карпош 4, каде што претходно десетина дена истекуваше вода и ги поплавуваше соседните улици.
Акцијата започна во раните утрински часови, со празнење на магистралниот водовод на критичните точки.
На акцијата за поправање на дефектите и модернизација на водоводот работеле повеќе од 160 вработени во ЈП Водовод и канализација – инженери, водоинсталатери, техничари и оператори.
Модернизацијата опфати репарација на шест клучни сегменти, вклучувајќи:
- Замена на пет воздушни вентили и затварачи на булевар Партизански одреди.
- Реконструкција на затварачи на мостот Обединети Нации, Порта Влае, и улицата Никола Парапунов.
- Замена на главниот затварач Ф700 на раскрсницата со булевар Партизански одреди.
Со овие зафати значително се подобрува водоснабдувањето и притисокот во општините Ѓорче Петров и Карпош, како и ефикасноста на целиот систем.
