Позната е процедурата за патување во земјите од Шеннген зоната според новиот ЕТИАС систем

Со новиот систем на ЕУ, кој треба да стартува во текот на 2025 година, патниците ќе мора да го пријавуваат своето патување во земјите од Шенген зоната

Процедурата за регистрација ќе биде онлајн на интернет страницата на ETIAS или на мобилна апликација, и ќе можат да се пријават сите кои поседуваат биометриски пасош. Најпрво пополнувате апликација во која се наведуваат следните информации:

– Лични информации вклучувајќи ги вашето име(и), презиме, датум и место на раѓање, националност, домашна адреса, имиња на родители, адреса на е-пошта и телефонски број;

– Детали за патниот документ;

– Детали за вашето ниво на образование и моментално занимање;

– Детали за планираното патување и престој во која било од земјите за кои е потребен ETIAS;

– Детали за какви било кривични пресуди, какви било минати патувања во воени или конфликтни зони и дали неодамна сте биле предмет на одлука со која се бара да ја напуштите територијата на која било земја.

– Доколку некој ја поднесува апликацијата во ваше име, тоа лице ќе мора да го даде своето презиме, име, и податоци за контакт на организацијата или фирмата (ако е применливо), како и информации за нивната врска со вас и потврда дека ова лице и вие сте ја потпишале изјавата за застапување.

На крајот ќе треба да платите надомест од 7 евра, исто така онлајн. Од плаќање на надоместокот се ослободени лица под 18 и над 70 години возраст, како и членови на семејство на државјани на ЕУ или на лица кои имаат регулиран престој во ЕУ.

Процесот на одобрување може да трае околу 20 минути, но доколку се јави проблем може да се оддолжи и до 30 дена. Известување за успешноста на апликацијата добивате преку вашата имејл адреса.

Системот за влез/излез (EES) ќе го замени старинскиот процес на ставување печат на пасошите со дигитална евиденција на влезот и излезот на патниците. Оваа новина ќе овозможи поефикасно следење на движењето на патниците кои не припаѓаат на земјите-членки на ЕУ секој пат кога ќе го преминат граничниот премин. Без физички печат, граничната контрола ќе се поедностави, а самото следење ќе биде многу попрецизно.

Слично на американскиот ESTA, ETIAS ќе биде задолжителен за патниците од земји кои не се членки на ЕУ, а кои уживаат право на безвизни патувања во ЕУ. Пред да патуваат, тие ќе мораат да аплицираат за одобрување преку онлајн апликација и да платат такса од 7 евра. Ова овластување ќе биде валидно за две години и ќе обезбеди поедноставен пристап при следниот влез во ЕУ.