САД се надеваат дека ќе го пронајдат жив новинарот киднапиран пред 12 години во Сирија

По падот на режимот на Башар ал Асад, амерканските власти контактираат со луѓе во Сирија за да добијат повеќе информации за судбината на Остин Тајс, американски новинар кој бил киднапиран пред повеќе од 12 години.

Поранешниот маринец и новинар бил киднапиран во август 2012 година на 31-годишна возраст додека известувал од Дамаск за бунтот против Асад.

Сириските власти до последно тврдеа дека не го држат во заробеништво американскиот новинар.

„Приоритет е да го пронајдеме Остин Тајс, да го лоцираме затворот каде што може да биде држен, да го ослободиме и безбедно да го вратиме дома кај неговото семејство. Комуницираме со Турците и други луѓе на терен во Сирија и им порачуваме: ‘Помогнете ни со ова. Помогнете ни да го вратиме Остин Тајс дома’“, истакна Џејк Саливан од Советот за национална безбедност на Белата куќа.

Американскиот претседател Џо Бајден вчера изјави дека владата верува оти Тајс е жив.

„Мислиме дека можеме да го вратиме, но сѐ уште немаме директни докази за тоа“, додаде Бајден, нагласувајќи дека напорите за негово лоцирање се во тек.