Skip to content
Американската економија во март создала 228.000 работни места, значително повеќе од очекуваните 130.000 и речиси двојно повеќе од ревидираните 117.000 за февруари. Набљудувачите сметаат дека порастот е резултат на економското закрепнување по шумските пожари и невремето во западниот и централиот дел на земјата, катастрофи што го забавија растот.
Во март, стапката на невработеност се зголеми од 4,1 на 4,2 отсто, делумно поради појавата на нови лица на пазарот на труд, се наведува во денешниот извештај на Бирото за труд.
Економистката Дејна Петерсон во изјава за „Си-Ен-Ен“ предупреди дека ова може да биде „затишје пред бура“, а поради новите царини воведени од администрацијата на Трамп. Таа вели дека тарифите би можеле да предизвикаат стагфлација – комбинација од слаб економски раст, повисока инфлација и раст на невработеноста.
Првиот човек на Федералните резери, Џером Пауел, денеска изјави дека е премногу рано да се донесуваат одлуки за каматните стапки, по стравувањата од ценовни шокови поради тарифите.
Американските берзи го започнаа денешниот ден со пад, откако Кина возврати со контрацарини, зголемувајќи ги тензиите во глобалната трговска војна. Фјучерсите се стабилизираа накратко пред објавата за работните места, но повторно паднаа по анализата на податоците.
