Skip to content
„Министерката Кочоска повторно докажува дека е целосно надвор од реалноста, убедувајќи ги граѓаните дека живеат добро и дека економијата расте“, реагираат од СДСМ на денешната прес конференција на министерката за финансии Гордана Димитриеска Кочоска, кога рече дека македонската економија повеќе не била во стагнација. Социјалдемократите тврдат дека министерката нема допир со секојдневието на луѓето. Тие ја повикаа министерката излезе на улица и да ги праша граѓаните како ја оценуваат економската состојба и како навистина живеат.
„Министерке, економијата не само што не расте – таа тоне! Тоне и животниот стандард на граѓаните, кои секој ден имаат сè помалку пари. Цените ги оставивте да растат, платите не ги покачувате, но вашата плата не ја намалувате. Странските инвестиции си одат, работници се отпуштаат, а 83.000 граѓани годинава не земале плата. Срамно и жално е да ги лажете граѓаните од прес-конференции – тие најдобро знаат колку е тешко да се живее откако вие сте на власт. Не презедовте ниту една мерка за подобрување на животниот стандард, но беспрекорно ја заштитивте вашата плата. Вие и останатите министри се возите со приватни авиони, јадете манго и папаја во Владата – за тоа има пари, но за граѓаните нема“, велат во СДСМ.
Ја повикаа Димитриеска Кочоска, да биде доблесна и да признае дека економските политики што ги спроведува не им носат ништо на обичните граѓани, туку служат само за збогатување на вашите блиски.
