СДСМ за СКАНДАЛОТ „Ѓока“: Документи откриваат дека уште од ноември минатата година Владата решила да ја оштети државата со паркингот во Клинички!

Социјалдемократите докрај ќе го тераат СКАНДАЛОТ “Ѓока“. ОД таму посочуваат дека на виделина излегуваат сè повеќе докази за криминалната зделка на Владата на Мицкоски и Таравари за паркингот во Клиничкиот центар!

„Објавениот оглас за тендерот јасно потврдува дека Министерството за здравство и министерот Арбен Таравари уште од самиот почеток однапред ја договориле оваа зделка за „Ѓока Констракшн“, при што приватната компанија ќе добие 99% од приходите, а државата само мизерен 1%! Документите кои ги криеше Таравари објавени во медиумите го потврдуваат она во што се соменваше СДСМ“, пишува во партиското соопштение на СДСМ.

Според нив, огласот објавен во ноември минатата година покажува дека самото Министерство за здравство поставило услов концесионерот да плаќа само 1% од приходите на државата! Тоа значи дека не понудувачот, туку министерството тоа го ставило како услов.

„Таравари и Мицкоски свесно решиле паркингот да го предадат на приватна фирма, оставајќи ја државата без приход, додека пациентите ќе плаќаат речиси двојно поскапо паркирање! Ова е јасен доказ дека целата постапка е сомнителна и дека некој од власта ќе профитира од оваа зделка на грбот на граѓаните!Но тоа не е сè – од истата објава јасно се гледа дека еден од условите за учество на тендерот бил компанијата да има изградено мостови! Каква врска има изградбата на мост со поставување монтажни гаражи во Клиничкиот центар?! Ова е класичен доказ дека тендерот бил специјално скроен за „Ѓока Констракшн“, компанијата што го има изградено мостот „Ваша“ во Албанија. Со овој сомнителен услов, Владата оневозможила реална конкуренција и обезбедила однапред познат победник“, велат во СДСМ.

СДСМ бара итна истрага за корупција! ‘Институциите не смее да молчат. Ова е скандал без преседан, вакво распродавање на државниот имот на штета на граѓаните ипострашно, на пациентите не е запаметено’.

Според СДСМ, Владата не смее да го забошоти овој случај, а Мицкоски и Таравари ќе мора да одговараат за овој класичен пример на корупција!

„Ова не е само обичен тендер – ова е обид за директен грабеж на јавните ресурси! Додека граѓаните плаќаат скапи услуги, владините функционери си договараат зделки што носат милионски профити за приватни фирми“, велат во СДСМ.