Се повлекуваат банкноти од 50 евра

Централната банка на Шпанија одлучи постепено да ги повлече од оптек банкнотите од 50 евра, а сè започнува овој април. Причина за оваа мерка е големиот број оштетени банкноти кои се означени со мастило од безбедносни системи против кражба поставени во банкомати, јавуваат шпанските медиуми.

Токму банкнотите од 50 евра, заедно со оние од 20, најчесто се во оптек во Шпанија, но затоа се најизложени на обиди за фалсификување и оштетувања поради активирање на заштитниот систем во случај на обид за кражба.

Станува збор за системи кои при обид да отворат банкомат без овластување, ослободуваат специјално мастило кое трајно ја оштетува банкнотата и ја прави неупотреблива. Според Централната банка, вака оштетените банкноти повеќе не смеат да се користат во секојдневните трансакции.

Покрај борбата против фалсификувањето, целта на повлекувањето е да се зголеми безбедноста во пресрет на летната туристичка сезона, кога во Шпанија има значително поголем промет на готовина.

Иако готовината сè уште доминира како најчест начин на плаќање, податоците од Централната банка покажуваат зголемена популарност на дигиталните методи – картички и апликации како Apple Pay и Google Pay.