Штајнмаер: Американската администрација „не ги почитува воспоставените правила“

Американската администрација „не ги почитува воспоставените правила“ и Европа ќе мора да може „да се справи со ова“, изјави денеска германскиот претседател Франк-Валтер Штајнмаер за време на отворањето на Минхенската безбедносна конференција.

Тој нагласи дека „недостигот на правила не треба да стане модел за нов начин на организирање на светот“.

„Новата американска администрација има многу поинаква визија за светот од нас, која не ги зема предвид воспоставените правила, партнерства и изградената меѓусебна доверба. Не можеме да го промениме ова, но мора да го прифатиме и да се справиме со тоа“, истакна Штајнмаер.

„Не е во интерес на меѓународната заедница овој светоглед да стане доминантна парадигма“, нагласи шефот на германската држава.

Претседателот на водечката европска економија го критикуваше Вашингтон и за концентрацијата на политичката и економската моќ во рацете на Доналд Трамп.

„Верувам дека во моментов во Соединетите Држави се формира историски невидена концентрација на технолошка, финансиска и политичка моќ, предупреди Штајнмаер. „Како демократ, многу ми пречи кога малата деловна елита има моќ, средства и волја да ги редефинира повеќето правила на играта на либералните демократии“, истакна тој.