Што го предомисли Ахмети за мистериозно да исчезне воинственото видео

Воинственото видео на лидерот на ДУИ, Али Ахмети, синоќа мистериозно исчезна од социјалните мрежи. На снимката се гледаа сцени од воениот конфликт во 2001 година кога Ахмети беше командант на УЧК. Снимката која во текот на вчерашниот ден беше масовно споделувана од функционери на ДУИ, синоќа е избришана од интернет.

На снимката имаше воени песни за ОНА и командант Ахмети, како и фотографии и видеа од Ахмети во униформа на ОВК и средби на лидерот на ДУИ со косовските и албанските политичари. Во фокусот на милитантното видео беше обраќањето на Ахмети, во кое тој рече дека „никогаш не изгубил ниту една војна“.

„Јас доаѓам од народот, доаѓам од вашиот клас. Дај ми го мечот, пази како го ракувам. Никогаш не сум изгубил ниту една војна, бидејќи војниците ми го дадоа мечот“, вели Ахмети во видеото, пред да биде избришано од социјалните мрежи.

Од ДУИ, не гледаат ништо спорно на снимката бидејќи бил прикажан животот на Ахмети, без да биде наменета за провокација.

„Ова е всушност биографијата на нашиот лидер Али Ахмети. „Тоа не може да се оспори“, изјави денеска Рина Ајдари од ДУИ.

Од СДСМ го повика Ахмети „да излезе од националистичкиот филм“ и порачаа дека „намерните етнички провокации се неприфатливи“.

Министерот за внатрешни работи Панче Тошковски, изјави дека ДУИ со видеото сака да ја дефокусира јавноста од постапките против партиски функционери.