Што ќе се случи на 11 декември? Можно е Уставните судии да го вратат Законот за јазиците во Собранието на доработка!

Етно-политичките и интра-етничките тензии почнаа да ескалираат откако Уставниот суд најави дека на 11 декември конечно, по пет години, ќе одлучува по иницијативите за оспорување на одредби од Законот за јазиците, односно за употребата на албанскиот јазик.

Алармот кај ДУИ доплнително го покрена образложението на Уставниот суд дека „со Законот за јазиците политиката создаде своевиден правен хаос, кој резултира со политички хаос, недоверба и дилеми. Уставниот суд е на потег, не за мудра, туку да донесе уставно-правно втемелена и аргументирана одлука“, изјави претседателот на судот Костадиновски.

Но, ваквата најава ги крена страстите во редовите на ДУИ изразена преку „Европскиот фронт“, нарекувајќи ја политичка одлука на власта, која Уставниот суд треба само да ја озакони.

Оттаму тие преземаа низа реакции пред домашната и меѓународната заедница за спречување на „укинување“ на албанскиот јазик со што би се негирал Охридскиот рамковен договор и придобивките од него, како што е создавање на мултиетничкиот карактер на Македонија и нејзино претворање во моноетничка држава.

Последната акција на ДУИ беше да почне со „ноќни стражи“ пред зградата на Уставниот суд, за како што велат, заштита на албанскиот јазик.

Премиерот Христијан Мицкоски сепак смета дека на 11 декември нема да се случи ништо.

И претседателот на Уставниот суд не е сигурен што ќе се случи: „Што би можело да се одлучи, не знам и не можам да знам и нема да коментирам“, рече Костадиновски.

Соломонското решение можеби лежи во изјавата на Костадиновски дека е „можно да се искористи алатка од новиот Акт на Уставниот суд, односно судиите да изразат сомнеж за уставноста на законот и да го пратат во Собранието на доработка“.

Но, во меѓувреме и „Вреди“ и ДУИ во јавниот дискурс си разменуваат обвинувања кој е заштитник, а кој предавник на албанскиот јазик.

Додека ДУИ тоа го прави експлицитно и надвор од институциите со директен напад врз Владата како иницијатор на одлуката на Уставниот суд, ВРЕДИ се обидува низ внатре владини канали да ја „денфува“ одлуката на Судот.

Но заложбите и на двете партии се речиси идентични. Само за потсетување :

За ДУИ „Повикот за одбрана на јазикот е до сите, и не само на јазикот, туку ова е повик за стража на мултиетничка, демократска и европска Северна Македонија, да градиме држава и општество кое што цели кон Европската унија, но, за жал, ретроградни сили се обидуваат да не вратат назад, предизвикувајќи го најсветото за граѓаните“, рече Османи.

Вреди, пак, на Координативното тело вели дека нема да се меша во работата на Уставниот суд, но ја „оценува како опасна и неприфатлива нивната иницијатива за оценување на уставноста на Законот за употреба на јазиците“. И тие сметаат дека „оваа иницијатива, која доаѓа од сили познати по своите анти-НАТО ставови, не е ништо повеќе од обид за државен удар со правни експерименти“.

Инаку иницијатори за оспорување на одредбите од Законот за јазици се ВМРО-ДПМНЕ и Левица, Здружението „Светски македонски конгрес“, Солза Грчева, Тања Каракамишева Јовановска, Јове Кекеновски, како и Васко Лазески, Ивана Митевска, Томе Тодоровски, Клементина Брзановска и Владимир Стефановски.

Дали ВРЕДИ „заборава“ дека меѓу иницијаторите е и ВМРО ДПМНЕ кога вели дека иницијативата е од „сили познати по своите анти НАТО ставови!!!!

Или сепак, не заборава????