Силјановска-Давкова: Посакувам мирот да биде главна опција

Претседателката Гордана Сиљановска Давкова, првиот ден од Новата Година ги посети припадниците на Армијата во касарната „Јане Сандански“ во Штип. Обраќајќи им се таа нагласи дека мирот и безбедноста на една држава во најголем степен зависат од нашите вооружени сили.

„Убаво е да знаете дека стоите на чело на Армија, којашто е почитувана, компатибилна со останатите, иако е мала, таа е најголемиот гарант за нашиот мир. Во 2025 година, посакувам мирот да биде главната опција, и да не размислуваме за вооружување“, рече Сиљановска Давкова.

Претседателката посочи дека 2025-та е јубилејна година за ООН – 80 години, при што потсети дека Обединетите нации се создадени како мировен концепт – против војните во светот.

„Но, се соочуваме со војна. И Европската унија настана како мировен концепт и нејзините основачи Шуман, Аденауер, Де Гаспери, Моне тогаш велеа дека таквата организација ќе обезбеди траен мир, она што денеска мене ме загрижува е што војуваат европски држави Украина и Русија. Значи се надевам дека 2025 година ќе биде година во којашто местото каде што треба да решаваат проблемите Њујорк, ООН навистина ќе биде искористено“, рече Силјановска- Давкова.

Силјановска- Давкова денеска заедно со началникот на Генералштабот на Армијата, генерал-мајор Сашко Лафчиски, присуствуваа на презентација на подготвеноста на припадниците на Вториот пешадиски баталјон, како и празничен војнички ручек. дека припадниците кои се дел од Вториот пешадиски баталјон извонредно ја имаат поминато евалуацијата во 2022 година.

„Знам дека оваа година е најважната пред новата евалуација во 2026 година. Но, од редовните контакти со началникот, со генералите јасно ми е дека подготовките се постојани, дека тие се во кондиција, дека тие се во тек со современите доктрини на војување, но дозволете ми како некој кој не сонувал дека ќе биде сведок на презентирање на вакво современо оружје, да кажам дека јас од секогаш сум била за мирот, секогаш сум давала предност на мирот и мислам дека е многу почовечки и многу поумно секогаш превентивно да се постапува, а кога ќе дојде до војна, тоа е веќе пораз на оние кои не смееле да доведат до тоа“, рече Силјановска-Давкова.