Skip to content
Сирија се спротивставува на какво било странско мешање во нејзините внатрешни работи, соопшти сириското Министерство за надворешни работи.
Соопштение следи по израелскиот напад врз предградие на Дамаск во кој, според извори на Ројтерс, бил убиен член на сириските безбедносни сили при новата влада.
Во соопштението на сириското министерство, Израел не бил директно споменат, туку наводно забранетите насилни групи, пренесува агенцијата.
Сириските власти додадоа дека ја потврдуваат својата посветеност на заштитата на малцинствата што живеат на нивна територија.
„Сириската Арапска Република ја потврдува својата цврста посветеност на заштитата на сите сегменти од сирискиот народ без исклучок, вклучувајќи ги и членовите на заедницата Друзи, која отсекогаш била и ќе остане составен дел од (сириската) нација. Категорично се спротивставуваме на какво било странско мешање“, се наведува во соопштението.
Во меѓувреме, Израелските одбранбени сили (ИДФ) соопштија дека тројца сириски Друзи се евакуирани од Сирија за да добијат медицински третман во Израел по судирите на религиозна основа во соседната земја.
Израел претходно соопшти дека ги нападнал „екстремистите“ во Сирија кои нападнале членови на заедницата Друзи. Израелските акции следат по ветувањето на Израел да ги заштити Друзите во услови на религиозно насилство што избувна во предградијата на Дамаск во последните денови.
