Скриените трошоци за унгарскиот кредит, ги скара Битиќи и Кочоска

Пратеникот на СДСМ, Фатмир Битиќи, и министерката за финансии Гордана Димитриеска – Кочоска, се судрија, на денешните пратенички прашања за унгарскиот кредит. 

Битиќи ја обвини власта дека само за шест месеци, Владата на ВМРО-ДПМНЕ ги натовари граѓаните со  финансиски товар кој ќе предизвикаат големи проблеми врз економските и институционалните процеси во земјава.  Тој потенцираше дека нема распределба на првата транша од 250 милиони евра, бидејќи  ‘средствата не се доделени на стопанството, банките сè уште ги немаат критериумите за пласирање, а граѓаните веќе плаќаат камати за неповлечени средства’. 

„Почитувана министерке, зошто целата сума беше повлечена одеднаш, ако не постои јасен план и институционална подготвеност за нивна реализација?Јавноста заслужува да знае дали, можеби, поради грешки во договорот за задолжувањето со првите 500 милиони евра моравте да потпише Анекс на договорот затоа што парите, поради пропустот, не можете да ги префрлите кон Развојната банка и општините. Ако ова не е точно, дали тогаш парите ги немате префрлено на Развојната банка поради неликвидност на буџетот, односно ги ускратувате на стопанството за да ги потрошите за тековни буџетски расходи“?

Битиќи обвини дека власта крие информации и за трошоците на кредитот. Побара одговор од Димитриеска Кочоска, колку пари се платени на компанијата која ја избра Унгарската компанија. 

„Годинава, 1 милион евра беа пренаменети за „договорни услуги“, но за што точно се трошат овие средства, дали за банкарски провизии или за консултантски услуги, нема одговори. Покрај провизијата од 0,5% за неповлечени средства, добиваме и скриени трошоци за правни услуги кои во суштина немаат никаква врска со македонските институции, затоа што ќе се плаќаат не само за „заштита“ на права на банката, туку и за спроведување на нејзини права од договорот за задолжување.

Според СДСМ, во  однос на финансискиот товар кој е создаден, според пресметките, само за камати на ова задолжување, државата ќе плати 384 милиони евра за првите 500 милиони евра.Министерката за финансии Димитриеска Кочоска посочи дека целата постапка за унгарскиот кредит бил транспарентен. 

„Првиот кредит од 500 милиони евра беше повлечен затоа што дел од тие средства беа наменети точно за развојна банка и на општините. Во однос на кредитот претпоставувам дека тоа најмногу ве боли, зошто не плативме повеќе од еден милион евра на меѓународните институции кои посредуваат при издавање на еврообврзници и сега ви смета затоа што овој кредит 500 милиони евра не чини само 70 илјади евра трошоци кон правниот субјект.

Димитриеска Кочоска рече дека не знае за каков анекс зборува Битиќи, бидејќи да имало такво нешто требало да помине во Собрание.