Соларните балкони се сè попопуларни: Тие ги намалуваат сметките за електрична енергија, а нивната цена е многу прифатлива денес

Во некои случаи, приклучните соларни системи можат да покријат до 25 проценти од годишната потрошувачка на електрична енергија во домаќинството.

Европа доживува брз раст во употребата на приклучни соларни системи, кои овозможуваат брзо и лесно користење на сончевата енергија без сложени инсталации и големи инвестиции, според новиот извештај на „СоларПауер Јуроп“, здружение на компании од овој сектор.

Сончевата енергија е во подем низ Европа и светот, одејќи подалеку од традиционалните инсталации на покривите и големите соларни фарми.

Панели сега може да се видат покрај патиштата, железничките линии, над пасиштата и овоштарниците, а најновиот тренд во обновливата енергија доаѓа во форма на приклучни соларни системи.

Приклучните соларни системи, познати и како балконски електрани или мини соларни системи, се дизајнирани така што корисниците можат сами да ги инсталираат на балкони, тераси, во градини, на ѕидови или покриви. Тие обично содржат еден или два соларни модули кои можат да се вклучат директно во стандарден заземјен штекер.

Соларни балкони како решение за високи сметки

Според извештајот, пазарот на приклучни фотоволтаични системи во Европа доживува значителен раст. Ваквите системи стануваат сè попопуларни како одговор на зголемувањето на цените на електричната енергија.

Извештајот покажува дека во некои европски земји тие можат да покријат до 25 проценти од годишната потрошувачка на електрична енергија во домаќинствата. Покрај тоа, тие овозможуваат поголема енергетска независност, демократизација на производството на енергија и намалување на месечните трошоци.

Во Германија, комплет со еден модул од 400 вати порано чинеше помеѓу 300 и 500 евра, додека денес може да се најдат за 200 евра. Најнапредните системи со батерии можат да чинат до 1.500 евра, се вели во извештајот.

Гореспоменатата Германија е значително понапред во однос на бројот на балконски електрани. До крајот на 2024 година, регистрирани се 780.000 од овие системи, додека според проценките од извештајот, овој број би можел да достигне до четири милиони, бидејќи голем број мини електрани се нерегистрирани.

Во извештајот, исто така, се истакнува дека е зголемена употребата на мали капацитети за складирање батерии со капацитет од еден до пет киловат-часови, што овозможува складирање на вишокот произведена енергија. Само во Германија, бројот на мали батерии со капацитет помал од два киловат-часа се зголемил за дури 24 пати помеѓу 2023 и 2024 година.

Кои се најголемите предизвици?

Една од главните предности на приклучните соларни системи е нивната прифатлива цена и леснотијата на инсталација. Исто така, тие можат лесно да се транспортираат при преселба, што ги прави погодни за изнајмени станови и привремени згради. Инвестицијата во вакви системи се исплатува во рок од две до шест години, во зависност од големината на системот, локалниот соларен потенцијал и цените на електричната енергија.

Сепак, извештајот покажува дека постојат и одредени предизвици. Поради нивната мала големина и честопати лошата инсталација, овие системи не можат целосно да ги покријат енергетските потреби на домаќинствата. Од друга страна, сè уште не постои унифицирана регулатива за овие системи во Европската Унија, поради што правилата се разликуваат од земја до земја.

„На Европа ѝ се потребни јасни стандарди за производи и конзистентни упатства за инсталација за да се обезбеди безбедност, компатибилност на мрежата и доверба на потрошувачите“, рече Лиа Ле Пенујзик, раководител на проектот за извештајот.

Сепак, „СоларПауер Јуроп“ истакнува дека со растот на пазарот за приклучни соларни системи, европските земји почнуваат да воведуваат нови регулативи што овозможуваат нивна легализација и стандардизација. Се очекува Белгија да ги легализира приклучните соларни системи во април 2025 година, додека Германија веќе ги поедностави процедурите за нивна регистрација.

Германскиот регулатор VDE планира да го усвои првиот официјален стандард за приклучни соларни производи до крајот на 2025 година, што би можело да послужи како основа за поширока европска регулатива, се истакнува во извештајот.