Трендафилов: Денеска политичарите не напаѓаат затоа што бараме плата

Претседателот на Сојузот на синдикати на Македонија (ССМ), Слободан Трендафилов порача дека ќе дојде денот кога луѓето кои беа денеска на улица, да ги повикаат граѓаните да им се придружат во битката за поголема минимална плата.

„Денот кога ќе одлучиме како ќе ги нападнеме, ќе биде денот кога истите овие 300 луѓе, ќе одлучат да го повикаат народот на улица, доколку не нè почитуваат онака како што заслужуваме. Сметаме дека во една демократска држава , во едно демократско општество, една демократски избрана влада, треба да ги почитува претставниците на работниците, без оглед дали сме убави или не сме. Треба да ги почитуваат претставниците на работниците, и покрај тоа што не им се допаѓа барањето за зголемување на платите. Денеска политичари нè напаѓаат, затоа што бараме плата. Се надевам дека нема да биде обратно, ние да ги напаѓаме политичарите. Тоа што е опасно и што е преседан, е што владата се иззема во комплетниот случај од потребата за раст на платите и покрај тоа што таа е најголемиот работодавач во државатa“, рече Трендафилов, за ТВ Телма.

За нападите од владејачкатка партија Трендафилов вели дека ‘напаѓаат со сите средства, со тешка артилерија и се надеваат дека ние ќе се криеме и нема да се браниме. За наша среќа, не сме почнале ниту да се браниме, а камоли да напаѓаме’.