Skip to content
Европа мора да најде начин да креира заедничка политика кон Русија, дури и ако Унгарија се противи, изјави полскиот премиер Доналд Туск по состанокот на европските лидери во Париз. Тој нагласи дека сите учесници се согласиле дека Европа треба да одржува блиски односи со САД.
Италијанската премиерка Џорџа Мелони изјави дека лидерите разговарале и за потенцијалната улога на ООН во случај на договор за прекин на огнот меѓу Русија и Украина. Според нејзиното соопштение, европските лидери истакнале дека е важно да се осигури ефективно почитување на примирјето и надгледување на процесот, а ООН може да има улога во тоа.
Мелони нагласи дека Европа мора да ја продолжи соработката со САД за постигнување мир што ќе го гарантира суверенитетот и безбедноста на Украина. Таа изрази надеж дека на следниот координациски самит ќе учествува и американска делегација.
Чешкиот премиер Петр Фијала изјави дека во рамките на иницијативата што ја предводи Прага, Украина оваа година би можела да добие исто количество муниција како и во 2024 година. Според чешкото Министерство за одбрана, минатата година Киев добил околу 1,5 милиони артилериски гранати, благодарение на средствата обезбедени од неколку земји на НАТО.
