Туск: Полска и Франција финализираат договор за безбедносни гаранции

Полскиот премиер Доналд Туск изјави дека договорот за меѓусебни безбедносни гаранции меѓу Полска и Франција е во завршна фаза.

Туск присуствуваше на Самитот на таканаречената „коалиција на подготвените“, група од 27 претежно европски држави кои се согласија да ја продолжат поддршката за Украина во нејзината одбрана од Русија.

По Самитот во Париз, Туск изјави дека се сретнал со францускиот претседател Емануел Макрон за да разговараат за билатералните односи и други теми.

„Договорот меѓу Полска и Франција е речиси финализиран. Очекувам наскоро да го потпишеме“, изјави Туск.

Иако не откри детали за договорот, тој рече дека „ова може да биде пресвртна точка во меѓусебните безбедносни гаранции“.

Полскиот министер за надворешни работи, Радослав Шикорски, уште во јануари најави дека договорот ќе биде завршен во следните месеци и дека ќе даде нов импулс на полско-француските односи.

Туск истакна дека Макрон му нагласил оти поддршката за Украина не смее да ја ослаби одбраната на источниот фронт на НАТО и ЕУ.

Тој додаде дека сите учесници на Самитот биле согласни за неопходноста на помош за Украина и за важноста на одржување на цврсти односи со САД, и покрај предизвиците.