Skip to content
Влен обвинува дека последните настани во врска со меѓуетничките односи се организирана кампања на ДУИ. Од таму додаваат дека се што се случува е последица на досегашното лошо раководење на ДУИ. Дритон Сулејмани вели дека ДУИ дава сомнителни пораки кои наведуваат дека тие самите се организатори.
„Ако внимателно ги следевме изјавите на ДУИ од поодамна, пред да се случат овие работи, тие постојано предупредуваа за можни дестабилизации, наводно дека владата ВЛЕН, не ги претставува Албанците и дозволува Албанците да бидат понижувани и така натаму и по ваквите предупредувања, би рекол чудно, се случи случајот со знамето на денот кога како никогаш досега на сите градски плоштади се славеше денот на знамето, потоа го имаме случајот што се случи во Куманово и каде беше фатен авторот…Ова зборува и ни остава многу простор да се сомневаме дека самата ДУИ може да биде организатор на сите овие случаи“, вели Дритон Сулејмани, од ВЛЕН.
Од ДУИ, пак, ја префрлаат топката кај Влен. Од партијата на Али Ахмети, велат дека, сите овие постапки се дел од кампањата организирана од ‘нелегитимната влада’ и дека претставуваат сериозна закана за стабилноста и меѓуетничката хармонија на земјата.
„Соочено со оваа неприфатлива ситуација, Тесното претседателство одлучи да го свика највисокото тело на партијата во понеделник, да донесе одлуки за понатамошни чекори и да дефинира конкретни мерки за спречување на обидите на владата да ја дестабилизира земјата… ги повикуваме сите актери вклучени во овој монструозен и исклучително опасен план да го запрат ова лудило, бидејќи последиците ќе бидат незамисливи “, велат од ДУИ.
Политичките реакции доаѓаат по палењето на знамињата за време на прославата на 28 ноември и очекувањата од седницата на Уставниот суд каде ќе се разгледува законот за употреба на јазиците.
