За Русија е неприфатливо САД да му се закануваат на Иран со воени напади

Русија денеска соопшти дека се неприфатливи заканите со воени напади врз нејзиниот сојузник Иран и предупреди дека нападот врз Исламската Република може да предизвика потенцијално катастрофални резултати доколку бидат бомбардирани нуклеарните постројки.

Американскиот претседател Доналд Трамп во неделата му се закани на Иран со бомбардирање и споредни царини доколку Техеран не постигне договор со Вашингтон за неговата нуклеарна програма, а САД испратија дополнителни воени авиони во регионот.

На прашањето за иранската нуклеарна програма и опасностите од сегашната ситуација, руското Министерство за надворешни соопшти дека Москва е посветена на изнаоѓање решение за иранската нуклеарна програма што ќе ги почитува правата на Техеран за мирна нуклеарна енергија.

-Употребата на воена сила со која се закануваат противниците на Иран во контекст на спогодбата е незаконска и неприфатлива, изјави  Марија Захарова, портпаролка на Министерството.

„Надворешните закани за бомбардирање на иранската нуклеарна инфраструктура неизбежно ќе предизвикаат неповратна глобална катастрофа. Овие закани се едноставно неприфатливи“, рече таа.

Западните сили го обвинуваат Иран за таен план за развој на способноста за нуклеарно оружје со збогатување ураниум до високо ниво на фисиска чистота, надвор од она што тие велат дека е оправдано за цивилна програма за атомска енергија. Техеран наведува дека неговата нуклеарна програма е целосно прилагодена за цивилни енергетски цели.

Русија и Иран во јануари потпишаа „договор за сеопфатно стратешко партнерство“, иако нема клаузула за заемна одбрана. Според договорот, ако едната страна биде нападната, другата нема да му помогне на агресорот.

-Русија ги осудува американските закани, изјави заменик министерот за надворешни работи Сергеј Рјабков за списанието Life. 

Рјабков рече дека нападот врз Иран може да се претвори во поширок отворен конфликт на Блискиот Исток.

-Последиците од тоа, особено ако дојде до напад на нуклеарната инфраструктура, може да бидат катастрофални за целиот регион, рече Рјабков.